ភ្នំពេញ ៖ យុវជនឈាមរាវម្នាក់ បានទាក់ទងស្នេហាជាមួយនឹងក្មេងស្រីមិនទាន់គ្រប់អាយុម្នាក់ (អនីតិជន) អស់រយៈពេលជាង១ឆ្នាំមកហើយ និងធ្លាប់បានលួងលោមស្រីស្នេហ៍រួមរ័កមេត្រីជាមួយគ្នានៅក្នុងបន្ទប់ខាងស្រីជាញឹកញាប់ទៀតផង លុះញៀនញ៉ាម ឃើញឱកាសស្ងាត់ល្អ ក៏លបចូលទៅក្នុងបន្ទប់ក្មេងស្រីជាគូស្នេហ៍ បំណងរួមភេទជាមួយគ្នាម្តងទៀត ដឹងអី! ត្រូវឪពុកខាងស្រីតាមទាន់ ក៏ប្តឹងសមត្ថកិច្ចចាប់ខ្លួនខាងប្រុស យកទៅចាត់ការតាមច្បាប់។
ករណីយុវជនកំហូចលបចូលបន្ទប់កូនក្រមុំគេរួមរ័ក តែត្រូវឪពុកគេតាមទាន់នេះ បានកើតមានការភ្ញាក់ផ្អើលឡើង កាលពីវេលាម៉ោង១រំលងអធ្រាត្រ ឈានចូលថ្ងៃទី២៥ ខែកញ្ញា ឆ្នាំ២០១៨ នៅចំណុចបន្ទប់ជួលមួយកន្លែង ស្ថិតនៅតាមផ្លូវបេតុង ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ។
ជនសង្ស័យដែលល្បួងកូនស្រីគេរួមរ័ក រហូតត្រូវឪពុកខាងស្រីតាមទាន់ ប្តឹងប៉ូលិសឱ្យចាប់ខ្លួននេះ មានឈ្មោះនួន ពិសិដ្ឋ ហៅតូរ៉ូ អាយុ ២៣ឆ្នាំ មុខរបរកម្មកររោងចក្រ មានលំនៅផ្ទះលេខជួល តាមផ្លូវបេតុង ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ (មានផ្ទុកសារធាតុញៀនក្នុងទឹកនោម)។ ចំណែកក្មេងស្រីរងគ្រោះ មានឈ្មោះឡ.ម.វ អាយុ១៤ឆ្នាំ មុខរបរសិស្សសាលាប៊ែលធីអន្តរជាតិ ស្នាក់នៅផ្ទះជួល ផ្លូវបេតុង ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ។
ជនសង្ស័យខាងលើ ត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីរៀបចំកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការបន្តតាមនីតិវិធី៕
ប្រភព៖ នគរធំ