ផេកផ្លូវការកញ្ញាឯកផែនដីកម្ពុជា បានបញ្ចេញឈុតតំណាងជាតិ ដែលមានឈ្មោះថា “មាតាធម្មជាតិ” សម្រាប់កញ្ញាឯក កែវ សេងលីហួរ ទៅប្រកួតប្រជែងនៅប្រទេសហ្វីលីន នាពេលដ៏ខ្លីខាងមុខ។
កញ្ញា កែវ សេងលីហួរ មានកម្ពស់ ១ម៉ែត្រ៧២ មានដើមកំណើតនៅរាជធានីភ្នំពេញ នឹងគ្រងឈុតសម្លៀកបំពាក់ប្រពៃណីជាតិដ៏ប្រណិតនេះបានរចនាឡើងដោយ Madam Botiques បង្កប់នូវអត្ថន័យជ្រាលជ្រៅ និងផ្តោតសំខាន់ទៅលើនិមិត្តរូបនៃក្តីសង្ឃឹម និងការគោរពរបស់មនុស្សទូទាំងសកល។
កញ្ញា កែវ សេងលីហូរ បវរកញ្ញាផែនដីកម្ពុជា ឆ្នាំ២០១៨ នឹងចូលរួមការប្រកួតកញ្ញាឯកផែនដីលើកទី១៨ ក្រោមប្រធានបទ "ទេពអប្សរនៃមាតាភពផែនដី" ធ្វើឡើងនៅទីក្រុងម៉ានីល ប្រទេសហ្វីលីពីន ថ្ងៃទី ០៦ ខែតុលា ដល់ថ្ងៃទី ១៣ ខែវិច្ឆិកា ឆ្នាំ ២០១៨។
ឈុតសម្លៀកបំពាក់ដ៏ល្អប្រណិតនេះ ត្រូវបានបំផុសគំនិតដកស្រង់ចេញពីទម្រង់នៃរូបចម្លាក់ ដែលត្រូវបានចារលើផ្ទាំងសិលានៃប្រសាទដ៏ល្បីល្បាញរបស់ព្រះរាជាណាចក្រកម្ពុជា។ រួមបញ្ជូលជាមួយនិងទ្រង់ទ្រាយក្បូរក្បាច់ដ៏ល្អអនេកនៃដើមឈើ ដែលត្រូវបានចារឆ្លាក់លើប្រាសាទអង្គរវត្ត ក៏ដូចជាទម្រង់នៃការរចនាតាំងពី ក្រោយសម័យអង្គរ សតវត្សន៍ទី ១៥ បួករួមជាមួយគំនិតច្នៃប្រឌិត សហ័ស្សសម័យនៃស្នាដៃកូនខ្មែរនាពេលបច្ចុប្បន្ននេះ បង្កើតចេញជាឈុត “មាតាធម្មជាតិ” នេះឡើង។
រូបភាព៖ Facebook page Miss Earth Cambodia