រាជធានីភ្នំពេញ ៖ ក្រោយពីមានការបែកធ្លាយវីដេអូពេញបណ្តាញសង្គមហ្វេសប៊ុក និងការរិះគន់យ៉ាងខ្លាំងពីសំណាក់ពុកម៉ែ បងប្អូន ដោយការធ្វើទារុណកម្មមកលើកូនប្រុស យ៉ាងព្រៃផ្សៃ គ្មានក្តីមេត្តា មិនសមជាម្តាយនោះ នៅយប់ថ្ងៃទី១១ ខែតុលា ឆ្នាំ២០១៨ ស្ត្រីខាងលើត្រូវសមត្ថកិច្ចទៅតាមហៅដល់ផ្ទះ ដើម្បីសាកសួរនៅប៉ុស្តិ៍គោកឃ្លាង ទើបភ្ញាក់ខ្លួនស្រឡាំងកាំងរឿងរូបភាពរុំស្កុតមាត់កូននោះ មិនមែនកូនប្រុសទេ តែជាកូនស្រី ហើយវីដេអូនោះ គឺមានរយៈពេលជាង៦ខែកន្លងមកហើយ។
ស្ត្រីរូបនោះបានឆ្លើយសារភាពនៅចំពោះមុខសមត្ថកិច្ចថា គាត់មានឈ្មោះ សុទ្ធ ធារី អាយុ២៨ឆ្នាំ មុខរបរនៅផ្ទះ មានប្តីឈ្មោះ ឈឹម វីរៈ អាយុ៣២ឆ្នាំ មុខរបររត់ម៉ូតូឌុប មានទីលំនៅក្នុងភូមិតំណាក់ សង្កាត់គោកឃ្លាង ខណ្ឌសែនសុខ មានកូន២នាក់ ប្រុសអាយុ៧ឆ្នាំ និងស្រីអាយុ១ខួប៦ខែ មានឈ្មោះ ផល លីណា ។ កាលពីអំឡុងជាង៦ខែមុន កូនស្រីរបស់គាត់ទើបតែមានអាយុ១ខួប ហើយនាងជាក្មេងរពឹងខ្លាំងណាស់ ខណៈពេលដែលក្រុមគ្រួសារនៅជួបជុំគ្នា បានលេងជាមួយកូនគាត់ក៏យកស្កុតរុំមាត់កូនស្រីពៅរបស់គាត់លេង មិនមែនកូនប្រុស ដូចអ្នកលេងបណ្តាញសង្គមឃើញរូប ហើយថានោះទេ។
ស្រី្តខាងលើបានបន្តទៀតថា ក្នុងចេតនាលេងជាមួយកូននៅចំពោះមុខក្រុមគ្រួសារជុំគ្នាទាំងអស់ ប្អូនប្រុសបង្កើតឈ្មោះ សុទ្ធ មុន្នី អាយុ២៤ឆ្នាំ យកទូរស័ព្ទរបស់គាត់ម៉ាក Iphone 7Plush មកថតលេង ហើយក៏មិនបានបង្ហោះហ្វេសប៊ុកទេ។
ក្រោយពេលដែលប្អូនប្រុសរបស់គាត់បានជួបគ្រោះថ្នាក់ចរាចរាណ៍បែកក្បាលរហូតដល់សន្លប់ បាត់បង់ទាំងលុយកាក់ បាត់ទាំងទូរស័ព្ទ IPhone 7Plush មួយគ្រឿងរបស់គាត់នោះទៀតផង ។ អស់រយៈពេលជាង៦ខែមកហើយ ទើបតែក្នុងរយៈពេល២ទៅ៣ថ្ងៃនេះ ធ្វើឲ្យគាត់មានការភ្ញាក់ផ្អើលយ៉ាងខ្លាំង ។
ស្រ្តីខាងលើក៏បានអះអាងនៅចំពោះមុខសមត្ថកិច្ចថា នៅក្នុងវីដេអូនោះ ជាសកម្មភាពលេងសើចជាមួយកូនទេ មិនមែនម្តាយធ្វើទារុណកម្មឡើយ។
ដោយរងនូវការរិះគន់ជាច្រើននៅលើបណ្តាញសង្គមហ្វេសប៊ុក ស្រ្តីដែលជាម្តាយរូបនោះ ក៏បានចេញមកមុខធ្វើការសុំទោសជាសាធារណៈ ហើយសមត្ថកិច្ចក៏មិនបានឃាត់ឃាំងអ្វីដែរ ក្រោយសូមទោសរួច ក៏អនុញ្ញាតិឲ្យវិលត្រឡប់ទៅវិញ ៕
ដោយ៖ ភារ៉ា
