ភ្នំពេញ ៖ ព័ត៌មានបឋម ហេតុការណ៍នេះធ្វើឲ្យគ្រប់គ្នាភ្ញាក់ផ្អើលយ៉ាងខ្លាំងនៅលើស្ពានបាឡេ ស្ថិតនៅភូមិឃ្លាំងសាំង សង្កាត់ឬស្សីកែវ ខណ្ឌឬស្សីកែវ ។ ដោយនៅមុននេះបន្តិចម៉ោង៣និង០០នាទីរសៀលថ្ងៃទី២៣ ខែតុលា ឆ្នាំ២០១៨ នេះ មានករណីដ៏គួរឲ្យភ្ញាក់ផ្អើលមួយបានកើតឡើង ដោយមានបុរសម្នាក់ និងនារីម្នាក់ដែលជាគូសង្សារនឹងគ្នា បាននាំគ្នាទៅលោតទឹកសម្លាប់ខ្លួននៅលើស្ពានបាឡេ ដោយខាងប្រុសបានលោតទឹកលិចបាត់មុន រីឯនារីជាសង្សារបម្រុងនឹងលោតតែត្រូវគេជួយទាន់ពេល ។
បុរសដែលទៅលោតទឹកពីលើស្ពានបាឡេមានឈ្មោះ សាំង សុរាជ អាយុ២១ឆ្នាំ មានទីលំនៅម្តុំវត្តសន្សំកុសល សង្កាត់បឹងទំពុន ខណ្ឌមានជ័យ បានលោតទឹកលិចបាត់ស្រមោល នៅសល់តែនារីជាសង្សារមានឈ្មោះ អៀ ឆៃលី អាយុ១៩ឆ្នាំ ជានិស្សិតឆ្នាំទី១ មានទីលំនៅសង្កាត់ផ្សារដើមថ្កូវ ខណ្ឌចំការមន ។
បើតាមសម្តីរបស់សមត្ថកិច្ចបានប្រាប់ឲ្យដឹងថា គូរស្នេហ៍មួយគូរនេះ បានទាក់ទងគ្នា អស់រយៈបីឆ្នាំមកហើយ តែពេលថ្មីៗនេះអ្នកទាំងពីរមានទំនាស់ជាមួយគ្នា ដោយម្តាយខាងប្រុសហាក់មិនពេញចិត្តនារីជាសង្សារប្រុងបំបែកបំបាក់ចំណងស្នេហាគូស្នេហ៍១គូនេះ ។ ទាក់ទិនទៅនឹងការលោតទឹកធ្វើអត្តឃាតនេះផងដែរដោយសង្ស័យបុរសជាសង្សារមានទំនាស់គ្នារឿងប្រចណ្ឌនារីជាសង្សាររបស់ខ្លួន។
ដោយៈ ភារ៉ា