កំពង់ចាម ៖ កាលពីពេលទាបភ្លឺឈានចូលព្រឹកថ្ងៃទី២៦ ខែតុលា ឆ្នាំ២០១៨ ប្តីប្រពន្ធមួយគូរ ដែលមានជីវភាពក្រីក្ររកតែអង្ករច្រកឆ្នាំស្ទើរតែមិនបាននោះ ស្រាប់តែកើតបានកូនភ្លោះចំនួន៣នាក់ ប្រុសទាំងបី នៅក្នុងមន្ទីរពេទ្យខេត្ត។
ជាមួយនោះផងដែរ ឪពុកម្តាយក្មេងប្រុសបានប្រាប់ឲ្យដឹងថា រាល់ថ្ងៃគាត់កំពុងតែមានក្តីកង្វល់ជាខ្លាំង ព្រោះតែមិនមានលុយទិញ ទឹកដោះគោឲ្យកូនបោះ ក៏លើកដៃសំពះសុំក្តីសណ្តោសប្រណី ពីសម្តេចតេជោ មេត្តាជួយដល់កូនភ្លោះ៣នាក់នេះផង។
ឪពុកកូនភ្លោះ៣នាក់នោះមាន ឈ្មោះគង់ សុខុន អាយុ៤៤ឆ្នាំ ជាកម្មករសំណង់ ក្នុង១ថ្ងៃបានប្រាក់ចំនួន២៥.០០០រៀល ដើម្បីយកមកទិញអង្ករដាំបាយហូប ដោះស្រាយជីវភាពទាំងត្រដាបត្រដួស ។ ចំណែកឯស្រ្តីដែលត្រូវជាម្តាយមានឈ្មោះ ចាន់ រុន អាយុ៣៣ឆ្នាំ ។
ស្រ្តីជាម្តាយបានប្រាប់ឲ្យដឹងថា មុនពេលគាត់មានកូនទី៥នេះ គាត់ក៏ធ្លាប់ជាកម្មករយួរកំបោរឲ្យគេដែរ ដោយក្នុងមួយថ្ងៃទទួលបានប្រាក់ចំនួន២ម៉ឺនរៀលផងដែរ។ លុះពេលដែលគាត់មានផ្ទៃពោះកូនទី៥នេះ ស្រ្តីដែលជាប្រពន្ធមិនបានចេញទៅធ្វើការនៅទីណានោះទេ គឺមានតែប្តីតែប៉ុនណោះ ដែលជាអ្នករកលុយមកចិញ្ចឹមគ្រួសារ។ ស្រ្តីជាម្តាយបានបន្តទៀតថា កូនភ្លោះទាំងបីនាក់មានសុខភាពល្អទេ ដោយកូនបងគេទង្ងន់១,១០គីឡូក្រាម កូនទី២ទង្ងន់១,១០គីឡូក្រាម និងកូនទី៣ទម្ងន់១,៣០គីឡូក្រាម ។
នៅពេលឈឺពោះសម្រាលកូននោះ បុរសជាប្តី បានប៉ាវកង់បីមកដឹកប្រពន្ធទៅមន្ទីរពេទ្យ។ ពេលនេះពីរនាក់ប្តីប្រពន្ធរូបនេះ ពិតជាមានក្តីកង្វល់មិនដឹងថា តើរកលុយពីណាមកទិញទឹកដោះគោឲ្យកូនបៅនោះទេ ការងារសំណង់ក៏មិនបានធ្វើទៀត ។មានតែសុំក្តីករុណាពីសម្តេចតេជោ សូមមេត្តាជួយផ្តល់ជាថវិកា និងទឹកដោះគោ ដើម្បីសង្គ្រោះដល់កូនភ្លោះទាំង៣ផង ព្រោះសម្តេចចាត់ទុកថា កូនភ្លោះ៣ជាចៅរបស់សម្តេច ៕
ដោយ៖ អាខ្មៅ