កំពង់ឆ្នាំងៈ បុរសរូបនេះឈ្មោះ ស៊ុ ញ៉ អាយុ៥៥ឆ្នាំ មានទីលំនៅក្នុងភូមិគោកស្តៅ ឃុំទឹកហូតស្រុករលាប្អៀរ ខេត្តកំពង់ឆ្នាំង បានរៀបរាប់ឱ្យដឹងថា កូនស្រីដែលគាត់កំពុងតែស្វែងរកនេះមានឈ្មោះ សាំង សុជា អាយុ១៨ឆ្នាំ។ កន្លងទៅកូនស្រីគាត់បានទំនាក់ទំនងស្គាល់យុវជនម្នាក់តាម Facebook ហើយប្រាប់ថា គេមានស្រុកកំណើរនៅឯខេត្តកំពង់ចាម ប៉ុន្តែស្នាក់នៅភ្នំពេញ និងធ្វើការងារសំណង់។ បុរសម្នាក់ បានកាន់រូបថតកូនស្រី មកជួបអ្នកសារព័ត៌មាន ដើម្បីឱ្យជួយផ្សព្វផ្សាយ និងទៅប្តឹងប៉ូលីសសុំជួយអន្តរាគមន៍ បន្ទាប់ពីបាត់កូនស្រីជាទីស្រឡាញ់របស់ខ្លួនអស់រយៈពេល៤ថ្ងៃមកហើយ រកមិនឃើញ។ បន្ទាប់ពីនាងចេញពីផ្ទះទៅដាក់ពាក្យធ្វើការនៅរោងចក្រមួយ ស្ថិតក្នុងស្រុកកំពង់ត្រឡាច ខេត្តកំពង់ឆ្នាំង។
កាលពីថ្ងៃទី២១ ខែតុលា ឆ្នាំ២០១៨ យុវជនដែលទំនាក់ទំនងស្គាល់កូនស្រីគាត់នោះ បានមកលេងផ្ទះគាត់ ដោយមកជាមួយមានមនុស្សស្រីម្នាក់ និងមនុស្សប្រុស២នាក់ផ្សេងទៀត ដែលគេអះអាងថាជាបងប្អូន។ ក្រោយពីហូបបាយហើយ និងសម្រាកមួយសន្ទុះពួកគេក៏លាគាត់ត្រឡប់ទៅវិញ។ បុរសរូបនេះបានបន្តថា រំលងបាន៣ថ្ងៃ គឺនៅថ្ងៃទី២៣ ខែតុលា វេលាម៉ោង៧ព្រឹក កូនស្រីគាត់បានជិៈម៉ូតូចេញពីផ្ទះ ដោយបានប្រាប់គាត់ថា ទៅដាក់ពាក្យធ្វើការរោងចក្រ នៅឯស្រុកកំពង់ត្រឡាច។ ចាប់តាំងពីពេលនោះមកមានរយៈពេល៤ហើយ មិនឃើញកូនស្រីគាត់ត្រឡប់មកវិញឡើយ ទូរស័ព្ទក៏បិតមិនអាចទំនាក់ទំនងបានទៀត។
បុរសនេះបានឱ្យដឹងទៀតថា រូបគាត់និងក្រុមគ្រួសារបានដើររកគ្រប់ទីកន្លែងដែល សង្ស័យរហូតទៅដល់ខេត្តកំពង់ចាមទៀត ក៏ នៅតែរកមិនឃើញ ទើបមកសុំអោយសារព័ត៌មានជួយផ្សព្វផ្សាយ។ លោក ស៊ុ ញ៉ ឪពុកនារី ដែលបាត់ខ្លួននោះបានអំពាវនាវដល់សមត្ថកិច្ច បងប្អូនសាធារណៈជន ប្រសិនបើឃើញមនុស្សស្រី ដូចមានភិនភាគក្នុងរូបថតនេះ មេត្តាជួយផ្តល់ពត៌មានដល់ក្រុមគ្រួសារគាត់ផងតាមទូស័ព្ទលេខ ០៦៩ ៦៧៣ ២៥៥ ៕