ភ្នំពេញ៖ លោកម៉ុង មុនីសោភា ចៅក្រមស៊ើបសួរ សាលាដំបូងរាជធានីភ្នំពេញ បានចេញដីកាឃុំខ្លួនលោកស្រី លី អ៊ុអេង ដាក់ពន្ធនាគារបណ្តោះអាសន្នករណីចាយសែក គ្មានសាច់ប្រាក់ ជាង៣លានដុល្លារអាមេរិក កាលពីថ្ងៃទី៩ ខែវិច្ឆិកា ឆ្នាំ២០១៨។
លោកស្រី លី អ៊ុអេង នាយិកាក្រុមហ៊ុន លីអ៊ុអេងលីមីធីត ត្រូវបានសមត្ថកិច្ចចាប់ខ្លួន កាលពីថ្ងៃទី៨ ខែវិច្ឆិកា ឆ្នាំ២០១៨ នៅទឹកដីខេត្តសៀមរាបតាមដីការបស់សាលាដំបូងខេត្តសៀមរាប ពាក់ព័ន្ធនឹងការចេញសែក អត់សាច់ប្រាក់ ចំនួនជាង៣លានដុល្លារអាមេរិក។
សូមបញ្ជាក់ថា លោក ងួន ណារ៉ា ប្រធានសាលាដំបូងខេត្តសៀមរាប និងជាចៅក្រមស៊ើបសួរបានចេញដីកាបង្គាប់ឱ្យចាប់ខ្លួនលោកស្រី លី អ៊ុអេង កាលពីថ្ងៃទី២៦ ខែតុលា ឆ្នាំ២០១៨ ក្រោមការចោទប្រកាន់ពីបទ “មិនបំពេញកាតព្វកិច្ចចំពោះឧបករណ៍ដែលអាចជួញដូរបាន” ប្រព្រឹត្តនៅក្រុងសៀមរាប ខេត្តសៀមរាប កាលពីថ្ងៃទី២៥ ខែឧសភា ឆ្នាំ២០១៨។
ក្រៅពីសំណុំរឿងនេះ នៅមានប្រជាពលរដ្ឋ ចំនួន៨គ្រួសារ បានចោទលោកស្រី លី អ៊ុអេង ថារំលោភយកដីរបស់ ពួកគាត់ប្រមាណជាង ១០ហិកតា នៅភូមិចុងកៅស៊ូ សង្កាត់ស្លក្រាម ក្រុង និងខេត្តសៀមរាប។
បើតាមដីកាតុលាការ , មុនពេលចាប់ខ្លួននេះគឺលោកស្រី លី អ៊ុអេង បានគេចខ្លួនមិនទទួលខុសត្រូវ នៅពេលដែលសមត្ថកិច្ចបានទៅដល់គេហដ្ឋានរបស់លោកស្រី៕
ដោយ៖ ភត្រ្តា
.jpg?1751610233)
.jpg?1751610233)
