មណ្ឌលគិរី ៖ ជនបរទេសម្នាក់ត្រូវបានសមត្ថកិច្ចធ្វើការឃាត់ខ្លួនពីបទ វាយប្លន់យកម៉ូតូរបស់ពលរដ្ឋខ្មែរ ដែលជិះតាមផ្លូវយកទៅលាក់ទុកនៅផ្ទះជួលរបស់ខ្លួន រួចហើយដោះគ្រឿងបន្លាស់ចេញ ក្នុងគោលបំណងមិនឲ្យម្ចាស់រកឃើញ។ ហេតុការណ៍នេះបានកើតឡើង កាលពីវេលាម៉ោង១១និង៤៦នាទី ថ្ងៃទី១២ ខែវិច្ឆិកា ឆ្នាំ២០១៨ ស្ថិតនៅភូមិចំបក់ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ។
ជនសង្ស័យមានឈ្មោះថា christopher alexender (គ្រីស្តូហ្វើ អាលិចសែនឌ័រ) ភេទប្រុស អាយុ៣៤ឆ្នាំ ជនជាតិអាល្លឺម៉ង់ កាន់លិខិតឆ្លងដែនលេខ C4KX801XC ស្នាក់នៅបណ្តោះអាសន្នផ្ទះជួល ស្ថិតក្នុងភូមិដើមស្រល់ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី ។
សមត្ថកិច្ចបានប្រាប់ថា ជនសង្ស័យខាងលើ មានសារធាតុញៀន (វិជ្ជមាន) និង ត្រូវបាននាំខ្លួនមកកាន់ស្នងការដ្ឋាននគរបាលខេត្តដើម្បីកសាងសំណុំរឿងតាមនីតិវិធី ៕
ដោយ៖ វិសុទ្ធ