ខេត្តកំពតៈ ក្រោយពីរងការរិះគន់យ៉ាងចាស់ដៃ ពីសំណាកពុកម៉ែ បងប្អូន ក្នុងបណ្ដាញសង្គមរួចមក រឿងបោះបង្គោលក្នុងសមុទ្រស្ថិតនៅភូមិសាស្ត្រតំបន់ភ្នំដូង ក្នុងភូមិបឹងតាព្រាម សង្កាត់ត្រេីយកោះ ក្រុងកំពត ខេត្តកំពត។ កាលពីពេលថ្មីៗនេះ នៅព្រឹក ទី២៧ ខែឧសភា ឆ្នាំ២០១៩ ឯកឧត្តម ជាវ តាយ អភិបាលនៃគណ:អភិបាលខេត្តកំពត បានធ្វេីសន្និសីទកាសែតដេីម្បីឆ្លេីយតបទៅនឹងព័ត៌មានមួយចំនួន ដែលបានចុះផ្សាយអំពីករណីបោះបង្គោលចូលទៅក្នុងសមុទ្រ។
លោក ជាវ តាយ បានបញ្ជាក់ថា ដោយដំបូងឡេីយដីខាងលេីនេះ មានទំហំ៤៥.៦១៤ហិចតា នៅខាងកេីតភ្នំដូង ជាប្រភេទដីអ៊ូរចិញ្ចឹមបង្គារ និងក្តាម ហេីយត្រូវបានប្រជាពលរដ្ឋចំនួន១២គ្រួសារ ជាអ្នកកាន់កាប់អាស្រ័យផល។ នៅក្នុងឆ្នាំ២០០៨ ប្រជាពលរដ្ឋទាំង១២គ្រួសារនោះ បានស្នេីសុំចេញប័ណ្ណកម្មសិទ្ធិ ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ នាខែឧសភា ឆ្នាំ២០០៨ ទីស្តីការគណៈរដ្ឋមន្ត្រីក៏បានសម្រេចយល់ព្រម តាមសំណេីររបស់អភិបាលខេត្តកំពត ដេីម្បីចេញប័ណ្ណកម្មសិទ្ធិកាន់កាប់ស្របច្បាប់ លេីផ្ទៃដីស្នេីសុំខាងលេី ព្រមទាំងនឹងអនុញ្ញាតអោយប្រែក្លាយពីអ៊ូរចិញ្ចឹមបង្គារ ក្តាម ទៅជាតំបន់ទេសចរណ៍បែបធម្មជាតិ ឬទេសចរណ៍កែច្នៃ។
សូមជម្រាបថា ក្នុងរយ:ពេលប៉ុន្មានសប្តាហ៍នេះ មានសារព័ត៌មានមួយចំនួន បានចុះផ្សាយអំពីករណីបោះបង្គោលរំលោភបំពានទៅក្នុងសមុទ្រ នៅភូមិសាស្ត្រតំបន់ភ្នំដូង។ រដ្ឋបាលខេត្តបានចាត់ឲ្យមន្ត្រីជំនាញចុះពិនិត្យនៅទីទាំងជាក់ស្តែង និងស្រាវជ្រាវឯកសារពាក់ព័ន្ធ ឃេីញថា ករណីនេះ ពុំមានការរំលោភបំពានពីសំណាក់បុគ្គលណាម្នាក់ឡេីយ ព្រោះទីតាំងនេះមានការអនុញ្ញាតត្រឹមត្រូវតាមផ្លូវច្បាប់ ព្រមទាំងមានការឯកភាពដ៏ខ្ពង់ខ្ពស់ ពីសំណាក់សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។
