ភ្នំពេញៈ កាលពីវេលាម៉ោង១០ៈ៤០នាទីយប់ ថ្ងៃទី៩ ខែមិថុនា ឆ្នាំ២០១៩ ស្ថិតនៅចំណុចក្រោយវត្តស្ទឹងមានជ័យ ផ្លូវបេតុងគ្មានលេខ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។ មានករណីទាស់ពាក្យសម្ដីគ្នាមួយ ដោយមន្ត្រីក្រឡាបញ្ជីនៅសាលាដំបូងរាជធានីម្នាក់ កំពុងធ្វើដំណើរតាមម៉ូតូ PCX មួយគ្រឿង ពេលឃើញផ្លូវកកស្ទះចរាចរណ៍ខ្លាំង លោកក៏មានចិត្តឈប់ម៉ូតូចុះទៅជួយសម្រួលចរាចរណ៍បញ្ចៀសកុំឲ្យស្ទះ ស្របពេលនោះដែរ មានបុរសម្នាក់ទំនងជាស្រវឹងស្រាខ្លាំង បើករថយន្តមួយគ្រឿងម៉ាក TACOMA ចុះមកសម្លុតថា «អ្ហែងចេះស្អី?» រួចក៏រុញម៉ូតូលោកក្រឡាបញ្ជីឲ្យដួល ទើបឈានដល់កើតមានការឈ្លោះប្រកែកគ្នា ផ្អើលដល់ប្រជាពលរដ្ឋចេញមកចោមរោមមើល និងរាយការណ៍ប្រាប់សមត្ថកិច្ចមូលដ្ឋាន ចុះមកជួយអន្តរាគមន៍ ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញ បុរសម្នាក់ទំនងជាស្រវឹងស្រាជោកជាំ បានបើករថយន្តមួយគ្រឿង ម៉ាក TACOMA ពណ៍ស បិតពណ៍ខ្មៅ ពាក់ស្លាកលេខភ្នំពេញ 2T-5737 ធ្វើដំណើរតាមបណ្ដោយផ្លូវបេតុង ក្រោយវត្តស្ទឹងមានជ័យ ទិសដៅពីត្បូងទៅជើង លុះដល់ចំណុចកើតហេតុ ដែលជាផ្លូវបំបែកជាបួន ស្រាប់តែមានរថយន្តមួយគ្រឿងទៀត (មិនចាំម៉ាក) បានបើកចេញមក ហើយឃើញបុរសម្នាក់ ជិះម៉ូតូ PCX មួយគ្រឿង ពណ៍ស ពាក់ស្លាកលេខភ្នំពេញ 1GR-1659 មកឈប់ម៉ូតូអែបពីក្រោយ រួចចុះដើរទៅជួយបញ្ចៀសឲ្យបើកទៅផុត កុំអោយទើសគ្នា តែបែរជាបុរសម្នាក់ ស្រវឹងស្រា បើករថយន្ត TACOMA បែរជាខឹងមិនបានទៅមុន ទើបឈប់រថយន្តហើយចុះមកសម្លុតថា «អ្ហែងចេះស្អី?» រួចក៏រុញម៉ូតូ PCX នោះឲ្យដួល ទើបឈានដល់កើតមានការឈ្លោះប្រកែកគ្នាឡើង បង្កការរំខានដល់ដំណេករបស់ប្រជាពលរដ្ឋ ទើបនាំគ្នាបើកទ្វារចេញមកចោមរោមមើល និងរាយការណ៍ប្រាប់សមត្ថកិច្ចមូលដ្ឋាន ប៉ុស្តិ៍ស្ទឹងមានជ័យទី១ ចុះមកជួយអន្តរាគមន៍ទាំងយប់។
ក្រោយមកគេឃើញ សមត្ថកិច្ចប៉ុស្តិ៍ស្ទឹងមានជ័យទី១ ចុះមកកន្លែងកើតហេតុ ហើយបានសួរនាំភាគីទាំងសងខាង និងបងប្អូនប្រជាពលរដ្ឋនៅកន្លែងកើតហេតុ ហើយភាគីទាំងសងខាងនៅតែប្រកែកគ្នា ដោយម្ខាងអាងខ្លួនជាក្រឡាបញ្ជីនៅសាលាដំបូងរាជធានី និងម្ខាងអាងមានខ្នងធំ ទើបឡាំប៉ាមិនសុខចិត្តរៀងៗខ្លួន បង្កការភ្ញាក់ផ្អើលកាន់តែខ្លាំងឡើង រហូតមានក្រុមអ្នកសារព័ត៌មានជាច្រើននាក់មកដល់បន្តបន្ទាប់គ្នា ហើយបានសួរនាំឲ្យភាគីខាងម្ចាស់ម៉ូតូរៀបរាប់ប្រាប់ ពីដំណើររឿងហេតុបានដឹងហើយ ក៏នាំគ្នាទៅធ្វើការសាកសួរ បុរសដែលទំនងស្រវឹងស្រាជាអ្នកបើករថយន្ត TACOMA នោះ តែបុរសនោះប្រាប់តែមួយម៉ាត់ពីម៉ាត់ ហើយព្យាយាមដើរគេចចេញ។
ប្រភពបន្តថា ភ្លាមនោះបុរសដែលស្រវឹងស្រានោះ ដើរត្រលប់មកវិញ រួចឡើងបញ្ឆេះរថយន្ត ទោះជាសមត្ថកិច្ចព្យាយាមរារាំងឃាត់រថយន្តដែរ តែបុរសនោះមិនខ្វល់ឡើយ បានជាន់ហ្គែរបើករថយន្តចេញទៅ កៀរទាំងសមត្ថកិច្ចនគរបាល ដែលកំពុងរារាំងនោះបើកចេញទៅលឿនស្លេវតែម្ដង។ ភ្លាមនោះក៏មានក្រុមអ្នកយកព័ត៌មាន ចេញម៉ូតូជិះប្រដេញតាមពីក្រោយដែរ តែដោយសារតែមិនសូវស្គាល់ផ្លូវក្នុងភូមិសាស្ត្រនោះច្បាស់ ទើបរថយន្តបើកទៅបាត់ស្រមោលតែម្តង។
ក្រោយកើតហេតុ បុរសវ័យចំណាស់ដែលអះអាងថាខ្លួន ជាក្រឡាបញ្ជីនៅសាលាតំបូងរាជធានីភ្នំពេញ បានប្រាប់ថាលោកនិងយកវិដេអូសកម្មភាព នៅក្នុងកាមេរ៉ាសុវត្ថិភាព (Go Pro) ដែលភ្ជាប់លើមួកសុវត្ថិភាពរបស់លោក យកមករៀបចំជាឯកសារ ដាក់ពាក្យបណ្ដឹងនៅប៉ុស្តិ៍ស្ទឹងមានជ័យទី១ នៅព្រឹកថ្ងៃទី១០ ខែមិថុនា ឆ្នាំ២០១៩នេះ ៕