មណ្ឌលគិរីៈ កាលពីព្រឹកថ្ងៃទី២៦ ខែមិថុនា ឆ្នាំ២០១៩ ស្ថិតនៅក្រុងសែនមនោរម្យ មន្ត្រីនៅមន្ទីរឧស្សាហកម្ម និងសិប្បកម្មខេត្តមណ្ឌលគិរី សហការជាមួយអាជ្ញាធរក្រុងសែនមនោរម្យ ដឹកនាំដោយលោក សុខ ប៊ុនធឿន អនុប្រធានមន្ទីរឧស្សាហកម្ម និងសិប្បកម្មខេត្ត។ បានចុះបិទទីតាំងផលិតទឹកសុទ្ធចំនួន៣កន្លែង ក្រោយរកឃើញថា ពួកគេមិនបានគោរពទៅតាមបទដ្ឋានបច្ចេកទេសត្រឹមត្រូវ ដែលនាំឲ្យមានការប៉ះពាល់ទៅលើសុខភាពអ្នកប្រើប្រាស់។
លោក សុខ ប៊ុនធឿន អនុប្រធានមន្ទីរឧស្សាហកម្ម និងសិប្បកម្មខេត្ត បានឱ្យដឹងថា ការចុះត្រួតពិនិត្យសិប្បកម្មផលិតទឹកពិសាដប ដោយពិនិត្យឃើញថា សិប្បកម្ម៣កន្លែង (សុំមិនបញ្ចេញឈ្មោះ) បានដំណើរការផលិតគ្មានអនាម័យ និងចែកចាយផលិតផលរបស់ខ្លួននៅលើទីផ្សារ ដោយគ្មានច្បាប់អនុញ្ញាតទេ។
ហើយមន្ត្រីជំនាញក៏បានរកឃើញថា ឧបករណ៍ចម្រោះទឹកដែលប្រើប្រាស់នោះ ទាំងបរិមាណផលិត ទាំងគុណភាពផលិត រួមទាំងទីតាំងផលិត គ្មានលក្ខណៈបច្ចេកទេសក្បួនអនាម័យទេ។ ម្យ៉ាងទៀត ខ្សែចង្វាក់ផលិតកម្មច្រកដប និងវេចខ្ចប់របស់សិប្បកម្មទាំង៣កន្លែងនេះ គឺមិនអនុលោមទៅតាមបទដ្ឋានបច្ចេកទេសទឹកពិសាដប ដែលអាចធ្វើឱ្យប៉ះពាល់ដល់គុណភាពទឹកពិសា និងសុខភាពអ្នកប្រើប្រាស់នៅលើទីផ្សារ ៕
.jpg?1751610233)
.jpg?1751610233)
