ព្រះសីហនុ៖ យោងតាមទិន្នន័យរបស់អាជ្ញាធរ ខេត្តព្រះសីហនុ បានប្រាប់ឲ្យដឹងថា អាជីវកម្មជាង ៩០ ភាគរយ នៅក្រុងព្រះសីហនុនាពេលបច្ចុប្បន្នត្រូវបានគ្រប់គ្រងដោយជនជាតិចិន រាប់ចាប់តាំងពីសណ្ឋាគារ កាស៊ីណូ ភោជនីយដ្ឋាន រហូតដល់ហាងម៉ាស្សា។
បើតាមលោក ជួន ណារិន្ទ បច្ចុប្បន្នក្នុងខេត្តព្រះសីហនុ មានសណ្ឋាគារ និងផ្ទះសំណាក់ចំនួន ១៥៦ កន្លែង ក្នុងនោះ ១៥០ កន្លែងគ្រប់គ្រងដោយជនជាតិចិន។ ចំណែកកាស៊ីណូមានចំនួន ៦២ កន្លែង វិនិយោគដោយចិនចំនួន ៤៨ កន្លែង ក្លិបកម្សាន្តខារ៉ាអូខេ មានចំនួន ៤១ កន្លែងគ្រប់គ្រងដោយជនជាតិចិន ហាងម៉ាស្សាចំនួន ៤៦ កន្លែង គ្រប់គ្រងដោយជនជាតិចិន និងមានភោជនីយដ្ឋានសរុបចំនួន ៤៣៦ កន្លែងក្នុងនោះ ៩៥ ភាគរយ ត្រូវបានគ្រប់គ្រងដោយជនជាតិចិន។
ក្នុងកិច្ចប្រជុំ ស្តីពីការបន្តនិរន្តរភាពការងារ និងពង្រឹងសន្តិសុខសណ្តាប់ធ្នាប់ក្នុងខេត្តព្រះសីហនុ កាលពីថ្ងៃម្សិលមិញ លោក ជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងថា ស្ថានភាពទូទៅរបស់ខេត្តព្រះសីហនុ គឺមានការវិនិយោគច្រើនពីជនបរទេស ពិសេសជនជាតិចិន ដែលធ្វើឲ្យខេត្តព្រះសីហនុ មានការរីកចម្រើនយ៉ាងឆាប់រហ័សលើគ្រប់វិស័យដូចជា សណ្ឋាគារ ផ្ទះសំណាក់ កាស៊ីណូ ភោជនីយដ្ឋាន ព្រមទាំងមុខរបរផ្សេងៗទៀត។