សម្តេចរាជបុត្រី ព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ព្រះស្ថាបនិកនៃមូលនិធិ មុទិតា ព្រះអង្គសព្វព្រះហឫទ័យយាង បាននាំយកនូវព្រះរាជអំណោយសម្តេចព្រះមហាក្សត្រី ព្រះវររាជមាតាជាតិខ្មែរ ទៅជូន...

នាវេលាព្រឹកថ្ងៃទី០៩ ខែធ្នូ ឆ្នាំ២០១៩នេះ សម្តេចរាជបុត្រី ព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា ព្រះស្ថាបនិកនៃមូលនិធិ មុទិតា ជាទីគោរពដ៏ខ្ពង់ខ្ពស់ ព្រះអង្គសព្វព្រះហឫទ័យយាងដឹកនាំក្រុមការងារនៃមូលនិធិ មុទិតា និងតំណាងក្រុមហ៊ុនជាដៃគូសហការ បាននាំយកនូវព្រះរាជអំណោយសម្តេចព្រះមហាក្សត្រី ព្រះវររាជមាតាជាតិខ្មែរ មានជា អង្ករព្រមទាំងសាប៊ូដុំ និងជំនួយសប្បុរសជនរួមមានជាសម្ភារៈសិក្សាជាច្រើនមុខ និងថវិការមួយចំនួន ប្រគេន ព្រះគ្រូចៅអធិការ និងព្រះសង្ឃ ព្រមទាំងលោកគ្រូអ្នកគ្រូ សិស្សានុសិស្ស ស្ថិតក្នុងបរិវេណវត្ត ព្រះពុទ្ធអង្គគង់បល្ល័ង្កផ្កាឈូក ក្នុងភូមិ ទំនប់សាប ឃុំលំហាច ស្រុកអង្គស្នួល ខេត្តកណ្តាល។ ឆ្លៀតក្នុងឱកាសនោះដែរសម្តេចព្រះស្ថាបនិក និងតំណាងក្រុមហ៊ុនជាដៃគូ បានមានព្រះបន្ទូល និងមតិសំណេះសំណាលសួរសុខទុក្ខ និងបង្រៀនការប្រើប្រាស់ព្រះរាជសព្ទខ្លីៗ វប្បធម៌ និងភាសាកូរ៉េខ្លះៗដល់ក្មួយៗសិស្សានុសិស្សនៅទីនោះផងដែរ។

ក្រោយបញ្ចប់កម្មវិធីសម្តេចព្រះស្ថាបនិក បាននាំតំណាងដៃគូសហការ ចូលទៅក្រាបថ្វាយបង្គំព្រះបរមអដ្ឋិ ព្រះករុណាព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត និងទស្សនាសមិទ្ធផលនានាដែលមូលធិនិ បានកសាងកន្លងមក និងប៉ុស្តិ៍សុខភាពសម្តេចព្រះមហាសង្ឃរាជ ប៊ួរ គ្រី ស្ថិតក្នុងវត្តព្រះឥន្ទ្រសាមគ្គីធម៌ ភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល ព្រមទាំងបានប្រគេនថវិកា ៣០០ដុល្លារសហរដ្ឋអាមេរិក ក្នុងឱកាសអបអរសាទរខួបទី២៨ នៃការរស់ឡេីងវិញនៃ គណៈធម្មយុត្តិកនិកាយ ក្នុងព្រះរាជាណាចក្រកម្ពុជាផងដែរ៕