ហ្វេសប៊ុក ៖ បងប្អូនច្បាស់ជាបានជ្រាបហើយថានៅកាលពីប៉ុន្មានថ្ងៃកន្លងទៅនេះមានលោកយាយម្នាក់ត្រូវកូនយកទៅបោះចោលយ៉ាងកំសត់ដោយគ្មានបាយគ្មានទឹកហូប អង្គុយបន្តើយំបន្តើឃើញហើយពិតជាគួរឲ្យអាណិតខ្លាំងណាស់ ។
យ៉ាងណាមិញនេះបើយោងទៅតាមគណនីហ្វេសប៊ុកដែលមានឈ្មោះថា Dana Try បានធ្វើការលើកឡើងឲ្យដឹងនៅលើបណ្តាញសង្គមហ្វេសប៊ុកថា ៖ ឃើញគេបង្ហោះរូបនេះឡើង មិនដឹងថាលោកយាយនៅឯណាទេ តែចង់ជួយគាត់ខ្លះ ចង់ឱ្យគាត់បានហូបឆ្ងាញ់ ដើម្បីបន្តដំណើរជីវិតទៅមុខទៀត ក្រែងជួបរឿងល្អជាងនេះ។ បើមានអ្នកណាស្គាល់ ជួយប្រាប់ផង។
ឱ្យតែឃើញរូបចឹងៗ ចេះតែមានអារម្មណ៍ថាចង់ស្រក់ទឹកភ្នែក នឹកដល់ឪពុកម្ដាយខ្ញុំ។ កាលពីមុន គាត់លំបាកតស៊ូគ្រប់បែបយ៉ាង ខំប្រឹងរហូតធ្លាក់ខ្លួនឈឺ ខ្ញុំមិនអាចជួយអីបាន មិនអាចរកលុយមើលគាត់ឱ្យជា មិនអាចឱ្យគាត់ស្គាល់ភាពសុខស្រួលក្នុងជីវិតចុងក្រោយ។
មុនពេលជីវិតខ្ញុំមានលំនឹង គាត់ក៏លាទៅបាត់ ទៅទាំងមិនទាន់ឃើញថាកូនស្រីម្នាក់នេះអាចធ្វើអ្វីបានខ្លះ ហើយអាចតស៊ូរហូតមានពន្លឺជីវិតដូចរាល់ថ្ងៃ។ តែកូនសប្បាយចិត្ត ដែលលោកទាំង២ ប្រាប់ថាត្រូវធ្វើអំពើល្អជានិច្ច ហើយអ្វីដែលខ្ញុំធ្វើគឺចេញពីចិត្ត មានអារម្មណ៍ថាសប្បាយ និងមានក្ដីសុខ។
គ្រប់ពេលដែលនឹកដល់ពួកគាត់ គឺខ្ញុំតែងជួយគេ ធ្វើអំពើល្អ ហើយសង្ឃឹមថាគ្រប់គ្នាអាចចែករំលែកទៅកាន់អ្នកអត់ជាងខ្លួន។ ខ្ញុំមិនមានអ្វីច្រើនទេ តែបើខ្ញុំនៅមានសមត្ថភាពអាចជួយគេ ខ្ញុំនឹងជួយរហូត។