មួយរយៈនេះនៅលើបណ្ដាញសង្គម ក៏ដូចជាពិភពលោកបានបង្ហាញពីក្ដីបារម្ភយ៉ាងខ្លាំងទៅលើជម្ងឺផ្លូវដង្ហើមដ៏កាចសាហាវថ្មីមួយដែលបង្ករឡើងដោយវីរុសឈ្មោះថា Coronavirus នោះ។ មានមនុស្សប្រមាណជា ៩នាក់បានស្លាប់ ហើយប្រមាណជាជិត ១ពាន់នាក់ទៀតបានឆ្លងជម្ងឺមួយនេះ និងទទួលបានការព្យាបាលពិសេស។
យ៉ាងណាក៏ដោយប៉ុន្មានម៉ោងមុននេះ បើតាមការចុះផ្សាយពីសំណាក់សារពត៌មានរុស្សី RT បានឱ្យដឹងថា អ្នកជម្ងឺម្នាក់ដែលមានផ្ទុកវីរុស Coronavirus ត្រូវបានព្យាបាលឱ្យជាដាច់ ហើយអនុញ្ញាតឱ្យចាកចេញពីមន្ទីរពេទ្យ មានសេរីភាពពេញទីដូចមនុស្សធម្មតាវិញ។
បើតាមការរាយការណ៍ពីប្រភពសារពត៌មានដដែល បានឱ្យដឹងបន្តទៀតថា ការព្យាបាលត្រូវធ្វើឡើងប្រមាណជា ៦ថ្ងៃ ទៅលើស្រ្តីម្នាក់ឈ្មោះ Chen ដែលគាត់ធ្លាប់ស្នាក់នៅ Wuhan កន្លែងដែលផ្ទុះរោគនេះផ្ទាល់ ហើយការធ្វើតេស្ដឈាមឃើញថាវីរុសនេះនៅផ្ទុកពេញក្នុងឈាម។
បន្ទាប់ពីឆ្លងកាត់ការពិសោធន៍ និងព្យាបាលពិសេសរួចមក គាត់បានក្លាយជាមនុស្សដំបូងដែលត្រូវព្យាបាលពីជម្ងឺរលាកផ្លូវដង្ហើមនេះ។ គូសបញ្ចាក់ថាមកទល់នឹងពេលនេះរដ្ឋាភិបាលចិនកំពុងតែប្រញាប់ប្រញាល់សាងសង់មន្ទីរពេទ្យមួយដោយប្រើពេលតែ ១០ថ្ងៃប៉ុណ្ណោះ ដើម្បីព្យាបាលអ្នកជម្ងឺមានផ្ទុកវីរុសកាចសាហាវមួយនេះ។ ប្រភព ៖ business cambodia