ភ្នំពេញ៖ ពិតណាស់ដូចដែលប្រិយមិត្តបានជ្រាបហើយថាបទចម្រៀងមួយបទដែលមានចំណងជើងថា”យប់នេះខ្ញុំចង់ញ៉ាំស្រា” ពេលនេះកំពុងតែទទួលបានការគាំទ្រយ៉ាងខ្លាំងពេញបណ្តាញសង្គមហ្វេសប៊ុកជាពិសេស  Tik Tokក្នុងរយៈពេលប៉ុន្មានខែចុងក្រោយនេះ។

ចំណែកឯម្ចាស់បទចម្រៀងខាងលើនេះមានឈ្មោះថា អ្នកនាង កាក់ ចន្ធី គឺ​ជា​តារា​ចម្រៀង​ល្បីនិយមច្រៀងបទ​ចម្រៀង​ចង្វាក់ រ៉ុកខេនរ៉ូលនិងធ្លាប់​មាន​ប្រវត្តិ​កម្សត់ បាន​បាត់​បង់​ជីវិត​អស់​រយៈ​ពេល​ប្រមាណ ២​ឆ្នាំ​ហើយ ដោយ​បន្សល់​តែ​បទ​ចម្រៀង​ជា​ច្រើន ដែល​ក្នុង​ចំណោម​នោះ មាន​ខ្លះ បាន និង​កំពុង​ល្បី​ខ្លាំង​នៅ​លើ​បណ្ដាញ​សង្គម Tik Tok។ ជាការសោកស្តាយដែលបទចម្រៀងរបស់អ្នកនាងដែលកំពុងទទួលបានការគាំទ្រច្រើនបែបជាមិនត្រូវបានបង្ហាញមុខលើឆាកតន្ត្រីច្រើនទៅវិញ។

កាក់ ចន្ធី ជាតារាចម្រៀងរ៉ុកឃែនខេនរ៉ូលខ្មែរតែមានប្រជាប្រិយភាពលើឆាកអន្តរជាតិ ដែលមានកំណើតពីទឹកដីខេត្តព្រៃវែងស្រុកកំពង់ត្របែក។ មិនល្បីខ្លាំងក្នុងស្រុក ប៉ុន្តែអ្នកនាងមានការពេញនិយមខ្លាំងនៅបរទេស ពិសេសប្រទេសបារាំង និងសហរដ្ឋអាមេរិក ដែលអ្នកនាងទទួលបានការគាំទ្រយ៉ាងច្រើនពីសំណាក់ភ្ញៀវអន្តរជាតិ ហើយនោះ ជាហេតុដែលអ្នកនាងជារឿយៗត្រូវបានទទួលការអញ្ជើញទៅចេញច្រៀងនៅក្រៅប្រទេសជាញឹកញាប់ ៕