មជ្ឍឹមបូព៌ា៖ យន្តហោះយោធាអ៊ីស្រាអែលបានវាយប្រហារគោលដៅនៅតំបន់ហ្គាហ្សា នៅព្រឹកព្រលឹមនៅថ្ងៃទី១៦ មិថុនានេះ គឺប៉ុន្មានថ្ងៃបន្ទាប់ពីការចូលកាន់តំណែងរបស់លោកនាយករដ្ឋមន្រ្តីថ្មី Naftali Bennett ។ វិទ្យុហាម៉ាសបានរាយការណ៍ថាយន្តហោះចម្បាំងរបស់អ៊ីស្រាអែលបានវាយប្រហារជំរុំហ្វឹកហាត់ប៉ាឡេស្ទីនមួយនៅតំបន់ ហ្គាហ្សានៅព្រឹកថ្ងៃទី ១៦ ខែមិថុនា។ ទីភ្នាក់ងារសារព័ត៌មានប៉ាឡេស្ទីន Shehab បានបន្ថែមថាកងកម្លាំងអ៊ីស្រាអែលក៏បានវាយប្រហារគោលដៅនៅជំរុំជនភៀសខ្លួន Yarrmouk ក្នុងតំបន់ Maan Bakhaniounis និងតំបន់ ហ្គាហ្សា ភាគខាងត្បូង។

នេះគឺជាការវាយប្រហារលើកដំបូងនៅលើតំបន់ហ្គាហ្សា មិនដល់មួយខែផងបន្ទាប់ពីក្រុមហាម៉ាសនិងអ៊ីស្រាអែលបានឈានដល់បទឈប់បាញ់មួយដើម្បីបញ្ចប់ជម្លោះរយៈពេល ១១ ថ្ងៃដែលបានសម្លាប់មនុស្សជិត ៣០០ នាក់និងប្រជាជនរាប់ពាន់នាក់ត្រូវបានភៀសខ្លួន។ វាក៏ជាការវាយប្រហារលើកដំបូងផងដែរចាប់តាំងពីនាយករដ្ឋមន្រ្តីអ៊ីស្រាអែលថ្មីលោក Naftali Bennett បានស្បថចូលកាន់តំណែងកាលពីថ្ងៃទី ១៣ ខែមិថុនា។

នៅក្នុងសេចក្តីថ្លែងការណ៍មួយនៅលើបណ្តាញសង្គម Twitter បន្ទាប់ពីការវាយប្រហាររបស់យោធាអ៊ីស្រាអែល (IDF) បាននិយាយថា“ យន្តហោះចម្បាំងរបស់យើងបានវាយប្រហារមូលដ្ឋានហាម៉ាសនៅតំបន់ Khan Yunis ភាគខាងត្បូងហ្គាហ្សា” ។ IDF បានបន្ថែមទៀតថាអ៊ីស្រាអែលបានត្រៀមខ្លួនសម្រាប់គ្រប់សេណារីយ៉ូទាំងអស់រួមទាំងការបើកការវាយប្រយុទ្ធគ្នាឡើងវិញផងដែរទៅលើតំបន់ទាំងនោះ។

IDF បាននិយាយថាការផ្លាស់ប្តូរនេះគឺដើម្បីឆ្លើយតបទៅនឹងកងកំលាំងហាម៉ាសនៅតំបន់ហ្គាហ្សាដោយបាញ់គ្រាប់រំសេវផ្ទុះចូលក្នុងទឹកដីអ៊ីស្រាអែល។ យោងតាមប្រព័ន្ធផ្សព្វផ្សាយក្នុងស្រុកបាននិយាយថាគ្រាប់រំសេវផ្ទុះដែលបាញ់ចេញពីតំបន់ហ្គាហ្សាទៅក្នុងទឹកដីរបស់អ៊ីស្រាអែលយ៉ាងហោចណាស់មានចំនួន ២០ គ្រាប់។

នាយករដ្ឋមន្រ្តីអ៊ីស្រាអែលថ្មីលោក Naftali Bennett បានបញ្ជាក់ថារដ្ឋាភិបាលអ៊ីស្រាអែលនឹងមិនអត់ធ្មត់ចំពោះការផ្លោងទម្លាក់គ្រាប់រំសេវផ្ទុះពីតំបន់ហ្គាហ្សាចូលទឹកដីអ៊ីស្រាអែលនោះឡើយ  ដោយថាខ្លួននឹងឆ្លើយតបយ៉ាងចាស់ដៃ ប្រសិនបើហាម៉ាសបាញ់គ្រាប់រ៉ុក្កែតចូលទៅក្នុងទឹកដីអ៊ីស្រាអែល។

កាលពីមុនលោក Bennett បានជំទាស់នឹងការបង្កើតរដ្ឋប៉ាឡេស្ទីននិងគាំទ្រដល់ការពង្រីកការតាំងទីលំនៅរបស់ជនជាតិជ្វីហ្វនៅតំបន់វេសប៊ែង។ទោះយ៉ាងណាមិនយូរប៉ុន្មានមុនពេលបង្កើតរដ្ឋាភិបាលចម្រុះមួយលោកបានមានប្រសាសន៍ថាសមាជិកទាំងអស់នៃរដ្ឋាភិបាលចម្រុះនឹងត្រូវពន្យាពេលជាបណ្តោះអាសន្ននូវការសម្រេចបាននូវបំណងប្រាថ្នារបស់ពួកគេ៕

សម្រួលអត្ថបទ៖SOPHEA

ប្រភព៖ dantri. vn