លោក វ្លូឌៀមៀ ហ្សាលេនស្គី បង្ហាញអារម្មណ៍ថាខ្លួនលែងមានចិត្ដចង់ចូលជាសមាជិកណាតូទៀតហើយនៅពេលនេះ

ប្រធានាធិបតីអ៊ុយក្រែនលោក Volodymyr Zelensky បាននិយាយនៅក្នុងបទសម្ភាសន៍ជាមួយទូរទស្សន៍ ABC News ថា ប្រទេសអ៊ុយក្រែនលែងស្វែងរកសមាជិកភាពនៅក្នុងអង្គការសន្ធិសញ្ញាអាត្លង់ទិកខាងជើង (NATO)ទៀតហើយ។ លោក Zelensky បានពន្យល់ថានេះគឺដោយសារតែណាតូ "មិនបានត្រៀមខ្លួនដើម្បីទទួលយកអ៊ុយក្រែន" ។

យោងតាមទីភ្នាក់ងារព័ត៌មានអ៊ុយក្រែន Interfax-Ukraine លោកZelensky បាននិយាយថា "ទាក់ទងនឹងណាតូ ខ្ញុំបានបាត់បង់ចំណាប់អារម្មណ៍លើបញ្ហានេះ បន្ទាប់ពីយើងដឹងថា ណាតូមិនទាន់ត្រៀមខ្លួនរួចរាល់ក្នុងការទទួលយកអ៊ុយក្រែន។

រ៉យទ័របានរាយការណ៍ថាលក្ខខណ្ឌដែលបានចែងរបស់រុស្ស៊ីសម្រាប់បទឈប់បាញ់រួមមានការតម្រូវឱ្យអ៊ុយក្រែនផ្លាស់ប្តូររដ្ឋធម្មនុញ្ញរបស់ខ្លួនដើម្បីរក្សាអព្យាក្រឹតភាព ដែលនឹងរារាំងខ្លួនពីការចូលរួមក្នុងអង្គការណាតូ ឬអង្គការស្រដៀងគ្នាណាមួយ ។

ប្រធានាធិបតីរុស្ស៊ី លោក វ្ល៉ាឌីមៀ ពូទីន ក៏បានទាមទារឱ្យអង្គការណាតូ ហាមឃាត់អ៊ុយក្រែន មិនឱ្យចូលក្នុងសម្ព័ន្ធមិត្ត ដែលដឹកនាំដោយអាមេរិក។ លក្ខខណ្ឌមួយទៀតគឺការទទួលស្គាល់គ្រីមៀជាទឹកដីរបស់រុស្ស៊ី។

AFP បានរាយការណ៍ថា នៅក្នុងអ្វីដែលហាក់ដូចជាការទទួលបានសិទ្ធិបន្ថែមទៀតដល់ប្រទេសរុស្ស៊ី លោក Zelensky ក៏បាននិយាយផងដែរថា លោកបើកចំហដើម្បី "សម្របសម្រួល" លើស្ថានភាពនៃទឹកដីផ្តាច់ខ្លួនពីរគឺ Donetsk និង Luhansk ជារដ្ឋឯករាជ្យ។