​មន្ត្រី​ឧទ្យាន​ជាតិ​កោះ​ស៊ី​មិ​ឡាន និង​មន្ត្រី​សន្តិសុខ​ប្រចាំកោះសមុទ្រ​កោះ​ស៊ី​មី​ឡាន របស់ប្រទេសថៃ ​បានធ្វើការ​ជួយបុរសម្នាក់​ឈ្មោះ HO HOANG HUNG អាយុ​៣៧​ឆ្នាំ ជនជាតិ​វៀតណាម កំពុងតែរសាត់អណ្ដែតនៅលើទូកកៅស៊ូ ពណ៌លឿងខៀវ ប្រវែង ប្រហែល ២,៥ម៉ែត្រ ។

ដោយនៅលើទូកនោះ មានផ្ទុកធុងទឹកផឹកមួយ ជាមួយនឹងវ៉ាលីស  ដែលកំពុងតែអណ្ដែតនៅលើផ្ទៃមហាសមុទ្រដ៏ធំល្វឹងល្វើយ ដែលទូករបស់គាត់ស្ថិតនៅចម្ងាយប្រហែល 14 គីឡូម៉ែត្រភាគខាងលិចនៃកោះ Similan ឬជាង 80 គីឡូម៉ែត្រពីឆ្នេរសមុទ្រនៃខេត្ត Phang Nga។ 

បើតាមការសាកសួរពីសំណាក់មន្ដ្រីឧទ្យានជាតិកោះ បុរសជនជាតិវៀតណាមរូបនោះបាននិយាយថា ខ្លួនបានធ្វើការជួលទូកកៅស៊ូ ដើម្បីធ្វើដំណើរតាមសមុទ្រ ដោយជិះទូកពីប្រទេសវៀតណាមទៅប្រទេសឥណ្ឌា ក្នុងគោលបំណងធ្វើដំណើរទៅជួបក្រុមគ្រួសារ និងភរិយា ដែលមិនបានជួបគ្នាយូរហើយ ដោយសារបញ្ហាជំងឺកូវីដ-១៩ ដែលកំពុងរាតត្បាត ដោយគាត់បានធ្វើការចែវទូកនៅក្នុងសមុទ្ររយៈពេល 18 ថ្ងៃមកហើយ ។

ថ្ងៃនេះ (២៤ មីនា) មន្ត្រីឧទ្យានជាតិកោះស៊ីមីឡាន និងបុគ្គលិកសន្តិសុខដែនសមុទ្រនៃកងទ័ពជើងទឹកកោះស៊ីមីឡានប្រទសថៃនឹងនាំបុរសជនជាតិវៀតណាមត្រឡប់ទៅច្រាំងវិញនៅឃុំឡាំកន ស្រុកថៃមឿង នៅម៉ោងប្រហែល ៤ និង ៤៥ នាទីល្ងាច តាមទូករបស់ក្រុមហ៊ុនទេសចរណ៍ ។

ជាមួយគ្នានោះដែរ អាជ្ញាធរថៃ បានធ្វើការផ្ដល់នូវម្ហូបអាហារ  ភេសជ្ជៈ និងការ​មើល​ថែ​សុខភាពដល់បុរស​ជន​ជាតិ​វៀត​ណាម និង​បានអនញ្ញាតឱ្យរូបគេស្នាក់​នៅ​កោះ​ស៊ីមីឡាន មុននឹងធ្វើសំណុំបែបបទបញ្ជូនទៅប្រទេសកំណើតវិញ ។