អស្ចារ្យណាស់! យុវជនខ្មែរម្នាក់ ជិះកង់ជិត ១ម៉ឺនគ.ម ឆ្លងកាត់ ៦ប្រទេស នៅអាស៊ាន រៃអង្គាសថវិកាបានជាង ៥ម៉ឺន ៦ពាន់ដុល្លារ ជួយមន្ទីរពេទ្យកុមារអង្គរ

ខេត្តសៀមរាប៖ កាលពីព្រឹកថ្ងៃទី២៦ ខែសីហា ឆ្នាំ២០២៣ ថ្នាក់ដឹកនាំ និងក្រុមការងារមន្ទីរពេទ្យកុមារអង្គរ បានមកទទួលស្វាគមន៍ អ្នកជិះកង់ លោក ទីវ តារារិទ្ធិ ដោយជិះកង់រួមគ្នា ចេញពីស្រះស្រង់ មកកាន់បរិវេណមន្ទីរពេទ្យកុមារអង្គរ។

មន្ទីរពេទ្យកុមារអង្គរ បានប្រកាស ជូនដំណឹងជាផ្លូវការថា បន្ទាប់ពីការធ្វើដំណើរជិះកង់អស់រយៈចម្ងាយ ៩ ៧៥០ គីឡូម៉ែត្រ ក្នុងប្រទេសអាស៊ានចំនួន ៦ប្រទេស ចំណាយពេលជិត ៣ខែកន្លងមក អ្នកជិះកង់ តារារិទ្ធិ បានរៃអង្គាសថវិកាសរុប ចំនួន ៥៦ ២៥៧ ដុល្លារអាមេរិក ($56,257) ជូនដល់មន្ទីរពេទ្យកុមារអង្គរ។

ថ្នាក់ដឹកនាំ បុគ្គលិកមន្ទីរពេទ្យកុមារអង្គរ និងអ្នកគាំទ្រជាច្រើនរបស់តារារិទ្ធិ បានស្វាគមន៍យ៉ាងអធិកអធម នៅក្នុងបរិវេណមន្ទីរពេទ្យកុមារអង្គរ។ នៅក្នុងឱកាសដ៏អស្ចារ្យនេះដែរ ក៏មានការប្រគល់ពានលើកទឹកចិត្ត និងប្រកាសលទ្ធផល នៃការរៃអង្គាសថវិការបស់តារារិទ្ធិ។

មន្ទីរពេទ្យកុមារអង្គរ ក៏បានប្រកាស ថ្លែងអំណរគុណយ៉ាងជ្រាលជ្រៅជាទីបំផុត ដល់អ្នកជិះកង់ផ្សងព្រេង តារារិទ្ធិ ចំពោះសមិទ្ធផលដ៏អស្ចារ្យ ការលះបង់កម្លាំងកាយចិត្ត ក្នុងការជិះកង់ផ្សងព្រេងម្នាក់ឯង ដើម្បីរៃអង្គាសថវិកាជូនដល់មន្ទីរពេទ្យកុមារអង្គរ និងសូមអរគុណដល់សប្បុរសជនទាំងអស់ដែលបានបរិច្ចាគថវិកាផ្ទាល់ខ្លួន និងគាំទ្រសកម្មភាពមនុស្សធម៌នេះ។