ចាប់បានស្រេច... លួចទ្រព្យសម្បត្តិគេរួច រត់គេចខ្លួនអស់រយៈពេល១៥ឆ្នាំ ពេលមកវិញ សមត្ថកិច្ចក្របួច.ក ជាប់ដដែល...
ស៊ីថា
- 652

បន្ទាយមានជ័យ៖ ចោរប្លន់ប្រដាប់អាវុធម្នាក់ ត្រូវបានសមត្ថកិច្ចធ្វើការឃាត់ខ្លួន បន្ទាប់ពីបានរត់គេច អស់រយៈពេល១៥ឆ្នាំមក ក្នុងករណីប្លន់ទ្រព្យសម្បត្តិ កាលពីឆ្នាំ២០០៣ នៅក្នុងខេត្តស្វាយរៀង ខណៈពេលត្រួវបានសមត្ថកិច្ចក្របួច.កជាប់នៅខេត្តបន្ទាយមានជ័យ នៅថ្ងៃទី២០ ខែមេសា ឆ្នាំ២០១៨។

ជនសង្ស័យឈ្មោះ ​ក្រូច ម៉ៃ អាយុ៥១ឆ្នាំ ​មានទីលំនៅភូមិដងរែក ឃុំបន្ទាយឆ្មា ស្រុកថ្មពួក ខេត្តបន្ទាយមានជ័យ ដែលជាប់ទាក់ទិនក្នុងករណី រួបរួមគ្នាប្លន់ទ្រព្យសម្បត្តិអ្នកដទៃ ប្រព្រឹត្តកាលពីថ្ងៃទី២៧​ ខែមិថុនា ឆ្នាំ២០០៣ នៅ​ចំណុចភូមិតាត្រាវ ឃុំកំពង់ត្រាច ស្រុករមាសហែក ​ខេត្តស្វាយរៀង​។
លោកឧត្តមសេនីយ៍ទោ កឹង ឃន បានឲ្យដឹងថា ការចាប់ខ្លួនជនសង្ស័យរូបនេះ ត្រូវបានធ្វើឡើងដោយ កម្លាំងនគរបាលខេត្តស្វាយរៀង ដឹកនាំដោយលោកឧត្តមសេនីយ៍ត្រី កុយ សុភាព ស្នងការរងទទួលផែនព្រហ្មទណ្ឌ ​សហការជាមួយកម្លាំងជំនាញ នៃស្នងការដ្ឋាននគរបាលខេត្តបន្ទាយមានជ័យ និងកម្លាំងកងទ័ពទីបញ្ជាការទិសថ្មពួក នៃតំបន់ប្រតិបត្តិការសឹករង​បន្ទាយមានជ័យ តាមដីកា​បង្គាប់ឲ្យចាប់ខ្លួនលេខ​០៧ ចុះថ្ងៃទី២៨ ខែ មករា ឆ្នាំ២០០៩ របស់លោក ឃី ឆៃ ចៅក្រមស៊ើបសួរនៃសាលាដំបូងខេត្តស្វាយរៀង។
បច្ចុប្បន្នជនសង្ស័យត្រូវបានបញ្ជូនមកការិយាល័យជំនាញ នៃស្នងការដ្ឋាននគរបាលខេត្តស្វាយរៀង ដើម្បីបំពេញនីតិវិធី​ចាត់ការតាមច្បាប់៕ ដោយ៖ បុត្រ

Loading...