ភ្នំពេញ ៖ បើយោងតាមរបាយការណ៍របស់សមត្ថកិច្ចបានបញ្ជាក់ថា សម្ភារៈខូចខាតក្នុងករណីអគ្គិភ័យរួមមាន ឃ្លាំងលក់រថយន្ត១ខ្នង ឆេះឡានអស់៤គ្រឿង ម៉ូតូ២គ្រឿង ។ ឃ្លាំងស្តុកលក់គ្រឿងបន្លាស់រថយន្ត (២ឃ្លាំង )ត្រូវបានឆាបឆេះទាំងស្រុង ផ្ទះល្វែង២ខ្នង (ថ្មក្រោម ឈើលើ ) រួមទាំងផ្ទះឈើ២ខ្នងទៀត ហើយគ្មានមនុស្សរងរបួសនោះទេ ។ ដោយសមត្ថកិច្ចបាន ប្រើប្រាស់រថយន្ត ពន្លត់អគ្គីភ័យទាំងអស់ចំនួន៤៣គ្រឿង និងពេលវេលាជិត៥ម៉ោង ។

ប្រភពបានបញ្ជាក់ថា អគ្គីភ័យនេះបានផ្តើមចេញ ពីឃ្លាំង រថយន្តយីហោ សោម ចន្ទថ្លា ( ទំហំប្រហែលទទឹង២០គុណ៣០ ) ឆេះខ្ទេចទាំងឃ្លាំងនិងរថយន្ត៤គ្រឿង រួចរាលដាលដល់ ឃ្លាំងលក់គ្រឿងបន្លាស់រថយន្ត២ទៀត ទី១ យីហោជា សិនឡា( ទំហំទទឹង២០គុណ៣០ ) និងឃ្លាំងទី៣ (ទំហំទទឹង១០គុណ៣០ ) រួចរាលដល់ផ្ទះល្វែងជាបន្តបន្ទាប់ ។ រថយន្តដែលឆេះខ្ទេចនោះ មានរថយន្តឡង់គ្រីស័រ ៥៧០ , រថយន្តអូឌី , រថយន្តឡង់រ៉ូវើ និងរថយន្តបាឡែន ។ ហើយកម្មករឃ្លាំងបាននិយាយថា ដំបូងគេឃើញឆេះលើរបងឃ្លាំង គាត់ក៏បានទាញទុយោទឹកទៅបាញ់ តែបាញ់ពុំឈ្នះ ហើយភ្លើងក៏បានឆាបឆេះដល់កេះឡាំងដាក់គ្រឿងរថយន្ត ហើយរាលដាលឆ្លងដល់រថយន្តឆេះយ៉ាងសន្ធោសន្ធៅតែម្តង ។ហើយពាក់ព័ន្ធ​នឹង​ការ​ឆាបឆេះ​នោះ នៅ​មិន​ទាន់​ដឹង​ពី​មូលហេតុ​នោះ​ទេ ។ ទោះជា​បែប​នេះ​ក្តី គ្រោះ​អគ្គិភ័យ​ដ៏​អាក្រក់​ខាងលើ សមត្ថកិច្ច​ជំនាញ​បាន​អន្តរាគមន៍​បាញ់​ទឹក​ទប់ស្កាត់ មិន​ឲ្យ​រាលដាល​ដល់​ផ្ទះ​ប្រជាពលរដ្ឋ​ដទៃ​ទៀត​ផង​ដែរ។ គួរបញ្ជាក់ផងដែរថា ៖ ហេតុការណ៍គ្រោះអគ្គីភ័យដ៏គួរឲ្យសោកស្ដាយខាងលើនេះ បានកើតឡើងកាលពីវេលាម៉ោង៣និង៣០នាទីទាបភ្លឺ​ ថ្ងៃទី១០ ខែឧសភា ឆ្នាំ២០១៨ នៅចំនុចឃ្លាំងលក់រថយន្តនិងលក់គ្រឿងបន្លាស់រថយន្តនៅតាមបណ្តោយផ្លូវលេខ២១៩ កែងនិងផ្លូវលេខ២២០ ស្ថិតក្នុងសង្កាត់ផ្សារដើមគ ខណ្ឌទួលគោក រាជធានីភ្នំពេញ ៕ ដោយ៖ ភារ៉ា