មណ្ឌលគិរី ៖ កាលពីប៉ុន្មានថ្ងៃមុននេះ មានករណីពុលទឹកដែលបណ្តាលឲ្យមានមនុស្សស្លាប់ចំនួន១៣នាក់ និងអ្នកនៅព្យាបាលនៅមន្ទីរពេទ្យមានចំនួនជិត២០០នាក់ នៅខេត្តក្រចេះ។ មិនទាន់បានប៉ុន្មានផងក៏មានករណីដូចគ្នានេះដែរ នៅខេត្តមណ្ឌលគិរី ស្រុកកែវសីម៉ា មានមនុស្សប្រុសស្រីចំនួន៣៤នាក់ ទៅ៨០នាក់ ដែលត្រូវក្រុមគ្រូពេទ្យដឹកយកទៅសង្គ្រោះបន្ទាន់ នៅមន្ទីរពេទ្យ។ លោកនួន សារ៉ន អភិបាលស្រុកកែវសីមា បានប្រាប់ថា គេមិនទាន់បានបញ្ជាក់ពីមូលនៃការពុលទឹកនេះនៅឡើយទេថា បណ្តាលមកពីមូលហេតុអ្វី ព្រោះអ្នកជំងឺទាំងនោះសុទ្ធតែមានអាការៈស្រដៀងទៅអ្នកពុលទឹកនៅខេត្តក្រចេះអញ្ជឹងដែរ។

បើតាមការឲ្យដឹងពីជនរងគ្រោះបានប្រាប់ថា ពួកគាត់បានបរិភោគទឹក មានខ្លះផឹកទឹកអណ្តូង មានអ្នកខ្លះទៀតផឹកទឹកអូរ តែមិនទាន់អាចសន្និដ្ឋានបានទេថា ជាករណីពុលទឹកនោះ ត្រូវរង់ចាំលទ្ធផលវិភាគរបស់ក្រុមអ្នកជំនាញសិន។ លោកនួន សារ៉ន បានបន្តទៀតថា នេះអាចបណ្តាលមកពីកង្វះអនាម័យរបស់អ្នកភូមិ ហូបទឹកឆៅ ឬទឹកដែលមានប្រភពមិនច្បាស់លាស់ ព្រោះនេះជារដូវភ្លៀង ណាមួយមានការដាំដុះដំណាំ និងប្រើប្រាស់ថ្នាំគីមីគ្រប់ប្រភេទ ដើម្បីការពារសត្វល្អិត ឬ ថ្នាំបង្កើនជីវជាតិ និងថ្នាំកម្ចាត់ស្មៅជាដើមនោះ។ ប្រភពដដែលបានបន្តទៀតថា គេសង្កេតឃើញប្រជាកសិករមួយចំនួនធំ ក្រោយពីបាញ់ថ្នាំគីមីរួច ភាគច្រើនពួកគាត់មិនសូវយកចិត្តទុកដាក់ ឬវេចខ្ចប់សំបកឲ្យបានត្រឹមត្រូវនោះទេ ស្របពេលនេះជារដូវភ្លៀងស្រាប់ផងនោះ សំបកដបខ្លះពុកផុយ លេចធ្លាយសារធាតុគីមីលាយឡំជាមួយនឹងទឹកភ្លៀងធ្លាក់ហូរចូលទៅក្នុងអូរ ទើបអ្នកភូមិប្រើប្រាស់ទៅអាចនឹងមានផលប៉ះពាល់ដល់សុខភាពបែបនេះ។ ដោយ៖ ពិទូ