ភ្នំពេញ៖ កាលពីថ្ងៃទី១០ ខែឧសភា ឆ្នាំ២០១៨ លោក ខាំ សុ​ផា​រី ព្រះរាជអាជ្ញារង នៃ​អយ្យការ​អម​សាលាដំបូង​រាជធានី​ភ្នំពេញ ជាមួយកម្លាំងចម្រុះ បានចុះ​ឆែកឆេរ​ផ្ទះ២ល្វែង នៅមុខ​ផ្សារ​ដី​ហុយ ខណ្ឌ​សែន​សុខ រកឃើញស្បែកនិងឆ្អឹងសត្វព្រៃ មានតម្លៃជាច្រើនគីឡូក្រាមផងដែរ ។

ប្រតិបត្តិ​ការចុះ​ឆែកឆេរ ផ្ទះ២ល្វែង​នេះ សមត្ថកិច្ច​បាន​រកឃើញ​សំណល់​ស្បែក​ខ្លា ឆ្អឹង​ខ្លា កន្ទុយ​ខ្លា ភ្លុក​ដំរី និង​កម្ទេចកម្ទី​សត្វព្រៃ​ជាច្រើន​ប្រភេទ សរុប​ជាច្រើន​គីឡូក្រាម។ ហើយ​សមត្ថកិច្ច ក៏បាន​ឃាត់ខ្លួន​ម្ចាស់ផ្ទះ​ទាំងពីរ​នោះ យកមក​សួរនាំ ព្រមទាំង​ដកហូត​ម៉ូតូ​មួយគ្រឿង និង​សម្រេច​បិទទ្វារ​ផ្ទះ​ទាំង២នេះ ជា​បណ្ដោះអាសន្ន​ផងដែរ។ ប្រតិបត្តិការ​រួច ស្បែក និង​ឆ្អឹង​សត្វព្រៃ​ទាំងនោះ អង្គភាព​ប្រតិបត្តិការ អន្ដរាគមន៍​បង្ក្រាប​ប​ទ​ល្មើស​ព្រៃឈើ​ចល័ត យកទៅ​រក្សាទុក​រង់ចាំ​ចាត់​បន្ត៕ ប្រភព៖ ហេងលី