កំពង់ចាម៖ កាលពីថ្ងៃទី១៥ ខែឧសភា ឆ្នាំ២០១៨ នៅ​ចំណុច​រង្វង់​មូល​គល់ស្ពាន​គី​ហ្សូ​ណា ស្ថិតក្នុង​ភូមិ​ទី៣ សង្កាត់​វាល​វង្ស ក្រុង​កំពង់ចាម ខេត្តកំពង់ចាម មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង ដែលបង្កឡើងដោយរថយន្ត​ហ៊ីយ៉ាន់ដាយចុះ​ពីលើ​ស្ពាន​គី​ហ្សូ​ណា បុក​រះ​ឡាន៣គ្រឿង និង​ម៉ូតូ២គ្រឿង មនុស្ស៤នាក់​រងរបួសធ្ងន់ស្រាល។

រថយន្ត​បង្ក​ម៉ាក ហ៊ីយ៉ានដាយ ពណ៌​ស ពាក់​ស្លាក​លេខ ព្រះសីហនុ 3A-3812 បើកបរ​ដោយ​ឈ្មោះ លី គឹម​លន់ ភេទ​ប្រុស អាយុ២៩ឆ្នាំ (រងរបួស​ស្រាល) នៅ​ភូមិ​ថ្មី​សែន​ជ័យ ឃុំ​ទួល​សុ​ភី ស្រុក​អូររាំងឪ ខេត្ត​ត្បូងឃ្មុំ។ ចំណែក​ជ​រងគ្រោះ​មាន​ចំនួន៤នាក់ ទី១/ឈ្មោះ ឈាង គឹម​ហ៊ាង ភេទ​ប្រុស អាយុ៣០ឆ្នាំ (រងរបួស​ស្រាល) នៅ​ភូមិ​អណ្ដូង​តា​ពេជ្រ ឃុំ​ថ្ម​ពួន ស្រុក​ព្រៃឈ ខេត្តកំពង់ចាម បើកបរ​រថយន្ត​ម៉ាក សាំ​យ៉ុង ពណ៌​លឿង ពាក់​ស្លាក​លេខ ភ្នំពេញ 2AJ-7749, ទី២/ឈ្មោះ ញ៉ា​ន ស៊ី​ណេ​ត ភេទ​ស្រី អាយុ២៦ឆ្នាំ (រងរបួស​ធ្ងន់) បើកបរ​ម៉ូតូ​ម៉ាក ហុងដា​ឌ្រី​ម ធុន​សេ១២៥ ពណ៌​ខ្មៅ ពាក់​ស្លាក​លេខ ស្ទឹងត្រែង 1A-2006 និង​ទី៣ជា​អ្នកជិះ​ពីក្រោយ​មានឈ្មោះ ហ៊​ន់ គា ភេទ​ស្រី អាយុ២៤ឆ្នាំ (រងរបួស​ស្រាល)។ អ្នក​ទាំងពីរ រស់នៅ​ភូមិ​ស្លាបក្ដោង ឃុំ​ជប់ ស្រុក​ត្បូងឃ្មុំ ខេត្ត​ត្បូងឃ្មុំ។ ដោយឡែក ជនរងគ្រោះ​ទី៤ ឈ្មោះ ច​ន សេរី ភេទ​ប្រុស អាយុ២៤ឆ្នាំ នៅ​ភូមិ​ត្រពាំងថ្ម ឃុំ​ក្រឡា ស្រុក​កំពង់សៀម ខេត្តកំពង់ចាម (មិន​រងរបួស​ទេ) បើកបរ​ម៉ូតូ​ម៉ាក ហុងដា​ឌ្រី​ម ធុន​សេ១២៥ គ្មាន​ស្លាក​លេខ។ បើតាមសាក្សីនៅកន្លែងកើតហេតុបានប្រាប់ថា រថយន្ត​ហ៊ីយ៉ាន់ដាយ​ធុន​ធំ១គ្រឿង ដែលមាន​ដឹក​ដើម​ដំឡូង​មី​ពេញប្រៀប បាន​បើក​ចុះ​ពីលើ​ស្ពាន​គី​ហ្សូ​ណា ទៅបុក​រះ​រង្វង់​មូល រថយន្ត៣គ្រឿង និង​ម៉ូតូ២គ្រឿង​ផ្សេងទៀត បណ្ដាល​ឲ្យ​មនុស្ស៣នាក់ ត្រូវ​រងរបួស​ធ្ងន់​ស្រាល។ ក្រោយ​កើតហេតុ សមត្ថកិច្ច​បាន​ឃាត់ខ្លួន​អ្នកបើកបរ ហើយ​រកឃើញ​ថ្នាំញៀន៣កញ្ចប់​ផងដែរ នៅក្នុង​រថយន្ត​បង្ក​នោះ។ គ្រោះថ្នាក់​ចរាចរណ៍​ខាងលើនេះ បង្កឡើង​ដោយ​រថយន្ត​ម៉ាក ហ៊ីយ៉ាន់ដាយ បើក​ចុះ​ពីលើ​ស្ពាន​គី​ហ្សូ​ណា ក្នុង​ទិស​ដី​ពី​កើ​តទៅ​លិច សង្ស័យ​ដាច់​ហ្វ្រាំង ក៏​ជ្រុល​ទៅបុក​រះ​រង្វង់​មូល​គល់ស្ពាន រួច​បន្ត​ទៅបុក​រថយន្ត​ម៉ាក សាំ​យ៉ុង ពណ៌​លឿង ដែល​កំពុង​បើកបរ​ពី​លិចទៅ​កើត និង​បុក​ម៉ូតូ​ម៉ាក ហុងដា​ឌ្រី​ម ស្លាក​លេខ ស្ទឹងត្រែង 1A-2006 ជិះ​ឌុប​គ្នា​ដោយ​នារី២នាក់​ទៀត។ ដោយសារ​រថយន្ត​មិនទាន់​អស់​ល្បឿន ក៏​ជ្រុល​ទៅបុក​បន្ត​រថយន្ត​ពីរ​គ្រឿង​ទៀត​ម៉ាក ហាយ​ឡែ​ន​ឌ័​រ និង​ម៉ាក តូ​យូ​តា ព្រមទាំង​បន្ត​បុក​ម៉ូតូ១គ្រឿង​ទៀត​ម៉ាក ហុងដា​ឌ្រី​ម គ្មាន​ស្លាក​លេខ ទើប​រថយន្ត​ឈប់​ទៅមុខ​លែងរួច។ យ៉ាងណា ម្ចាស់​រថយន្ត​ម៉ាក ហាយ​ឡែ​ន​ឌ័​រ និង​ម៉ាក តូ​យូ​តា មិនបាន​ទាមទារ​សំណង​អ្វី​ឡើយ ព្រោះ​រថយន្ត​រង​ការខូចខាត​បន្តិចបន្តួច។ ករណី​គ្រោះថ្នាក់​ចរាចរណ៍​ដ៏​រន្ធត់​នេះ បណ្ដាល​ឲ្យ​មនុស្ស​ម្នាក់ រងរបួស​ធ្ងន់ និង៣នាក់ រងរបួស​ស្រាល, ខូចខាត​រថយន្ត​ចំនួន៤គ្រឿង និង​ម៉ូតូ២គ្រឿង ខូចខាត​យ៉ាងដំណំ។ ចំពោះ​មូលហេតុ សមត្ថកិច្ច​សង្ស័យថា មកពី​រថយន្ត​ហ៊ីយ៉ាន់ដាយ បើក​ចុះ​ពីលើ​ស្ពាន​គី​ហ្សូ​ណា ហើយ​ដាច់​ហ្វ្រាំង ៕ ប្រភព៖ ហេងលី