អុញនោះទៀតហើយ...ឆែកឆេរទីតាំងសិប្បកម្មផលិតទឹកត្រី និងទឹកស៊ីអ៊ីវខុសស្ដង់ដារ ពុំមានចុះបញ្ជីត្រឹមត្រូវ ថែមទាំងក្លែងបន្លំប្រភពផលិត

ភ្នំពេញ៖ ក្រោមការបញ្ជាផ្ទាល់របស់លោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច លោកឧត្តមសេនីយ៍ទោ មាស រ៉ាវុធ ដឹកនាំកម្លាំងជំនាញសហការជាមួយវិទ្យាស្ថានស្តង់ដារកម្ពុជា សាខាកាំកុងត្រូល និងអាជ្ញាធរមូលដ្ឋាន ក្រោមការសម្របសម្រួលនីតិវិធីពីលោក ហ៊ឹង ប៊ុនថន ព្រះរាជអាជ្ញារងនៃសាលាដំបូងរាជធានីភ្នំពេញ នាថ្ងៃទី១៧ ខែឧសភា ឆ្នាំ២០១៨ កម្លាំងនគរបាលប្រឆាំងបទល្មើសសេដ្ឋកិច្ច នៃក្រសួងមហាផ្ទៃ សហការជាមួយស្ថាប័នជំនាញពាក់ព័ន្ធ បានបើកប្រតិបត្តិការចុះឆែកឆេរទីតាំងសិប្បកម្មផលិតទឹកត្រី និងទឹកស៊ីអ៊ីវសញ្ញាផ្កាឈូកមួយកន្លែងដែលមានទីតាំងស្ថិតតាមបណ្តោយផ្លូវឧកញ៉ាម៉ុងឫទ្ធី សង្កាត់ភ្នំពេញថ្មី ខណ្ឌសែនសុខ សង្ស័យជាផលិតទឹកត្រី-ទឹកស៊ីអ៊ីវខុសស្ដង់ដារ ពុំមានចុះបញ្ជី ច.ប.ផ ត្រឹមត្រូវ និងក្លែងបន្លំប្រភពផលិត។

សមត្ថកិច្ចបានរកឃើញទឹកត្រីសញ្ញាត្រីមាស និងត្រីរៀល និងទឹកស៊ីអ៊ីវសញ្ញាផ្កាឈូក ដែលបានវេចខ្ចប់រួច ៣,៤៨២កេះ ទឹកស៊ីអ៊ីវគ្មានស្លាកសញ្ញាចំនួន ៣៩៥កេះ ទឹកត្រីពុំទាន់ច្រកជាច្រើនធុង ព្រមជាមួយសម្ភារមួយចំនួនទៀត ដែលម្ចាស់ទីតាំងបានអះអាងថា នាំចូលពីប្រទេសជិតខាងយកមកកែច្នៃវេចខ្ចប់ដាក់ស្លាកសញ្ញាផលិតផលខ្មែរ ហើយពុំបានចុះបញ្ជី ច.ប.ផ របស់ស្តង់ដានោះឡើយ។

តាមការសម្រេចរបស់លោកព្រះរាជអាជ្ញារង សមត្ថកិច្ចបានវិចខ្ចប់ និងផ្អាកដំណើរការផលិតរបស់ទីតាំងសិប្បកម្មខាងលើ រង់ចាំការសម្រេចពីស្ថាប័នតុលាការ និងបាននាំម្ចាស់ទីតាំងឈ្មោះ ជា ចាន់ថា អាយុ៣៤ឆ្នាំ ជនជាតិខ្មែរ មកសាកសួរបំភ្លឺនៅនាយកដ្ឋាននគរបាលប្រឆាំងបទល្មើសសេដ្ឋកិច្ចដើម្បីបន្តនីតិវិធី ៕