ខេត្តកណ្ដាល៖ មានករណីគ្រោះថ្នាក់មួយដែលបង្ករឡើងដោយរថយន្តកុងតឺន័រមួយគ្រឿង ម៉ាក HINO បានបើកទៅបុករថយន្តមួយគ្រឿង ម៉ាក HYUNDAI​ បណ្តាលឲ្យរងរបួសយ៉ាងធ្ងន់ធ្ងរ ហេតុការណ៍នេះបានកើតឡើងនៅចំណុច ចំណុចភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល កាលពីវេលាម៉ោង ៩ និង៣០នាទី ថ្ងៃទី២៦ ខែឧសភា ឆ្នាំ២០១៨ ។

ប្រភពពីសមត្ថកិច្ចបានប្រាប់ឲ្យដឹងថា ករណីនេះកើតឡើងរវាងរថយន្ត ម៉ាក HINO (ហីណូ) ពណ៌លឿង ប្រភេទបែន ពាក់ស្លាកលេខ ភ្នំពេញ 3A- 7061 បើកបរដោយឈ្មោះ លឹម សុខខេង ភេទប្រុស អាយុ ៣៤ ឆ្នាំ មុខរបរបើកបររថយន្ត មានទីលំនៅ ភូមិ ភ្នំធំ ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ ធ្វើដំណើរទិសដៅពីអ្នកលឿងទៅភ្នំពេញ តាមផ្លូវជាតិលេខ១ លុះមកដល់​កន្លែងកើតហេតុខាងលើ បានបុកពីក្រោយរថយន្ត ម៉ាក HYUNDAI (ហ៊ីយ៉ាន់ដាយ) ពណ៌ស ប្រភេទសណ្តោង ពាក់ស្លាក​លេខ ព្រះសីហនុ 3A-1519 បើកបរដោយជនមិនស្គាល់អត្តសញ្ញាណ ដែលបើកបរមានទិសដៅស្របគ្នា ហើយអស់ប្រេងរលត់ម៉ាស៊ីនឈប់លើទ្រូងផ្លូវ ដោយគ្មានដាក់ភ្លើងសញ្ញានិងមិនបានដាក់អ្វីជាសញ្ញាបង្ហាញ ដល់អ្នកធ្វើដំណើរនោះទេ បណ្តាលឲ្យ​តៃកុងរថយន្តបែនដឹកដីរងរបួសធ្ងន់ ត្រូវបញ្ជូនទៅព្យាបាលនៅមន្ទីរពេទ្យព្រះកុសមៈ(ពេទ្យព្រះសង្ឃ) ។ តាមការសន្និដ្ឋាន​របស់​សមត្ថកិច្ច​អ្នកបើកបររថយន្តម៉ាក HYUNDAI ធ្វេសប្រហែស ខ្ជីខ្ជាមិនប្រុងប្រយ័ត្នឈប់មិនបើកភ្លើង មិនដាក់សញ្ញា។ ចំណែក​អ្នកបើកបរ រថយន្តម៉ាកHINO ឈ្មោះលឹម សុខខេង បើកបរល្បឿនលឿនមិនមើលស្ថានភាពផ្លូវខាងមុខមានឧបសគ្គ។ បច្ចុប្បន្នសមត្ថកិច្ចយកមករក្សារទុកជាភស្តុតាងនៅអធិការដ្ឋាននគរបាលស្រុកកៀនស្វាយ រង់ចាំដោះស្រាយពេលក្រោយ៕ ដោយ៖ និស្ស័យ