ព្រៃវែង៖ មានរឿងហេតុស្មានមិនដល់មួយបានធ្វើអោយមានការភ្ញាក់ផ្អើលពេញក្នុងមន្ទីរពេទ្យបង្អែកអ្នកលឿង កាលពីវេលារសៀលថ្ងៃទី២៥ ឧសភា ២០១៨ បន្ទាប់ពីក្រុមគ្រូពេទ្យធ្វើការវះកាត់ បង្កើតបានទារកចំឡែកមួយ ដែលមានក្បាលតែមួយ ខ្លួន២ ហើយមានជើង៤ និងដៃ៤ផងដែរ។ ហេតុការណ៍នេះបានបង្កការភ្ញាក់ផ្អើលនៅក្នុងមន្ទីរពេទ្យបង្អែកអ្នកលឿង ស្ថិតនៅឃុំអ្នកលឿង ស្រុកពាមរក៍ ខេត្តព្រៃវែង។

សេចក្ដីរាយការណ៍បានឲ្យដឹងថា ម្តាយទារកចំឡែកនេះ ត្រូវបានក្រុមគ្រូសារនាំមកដល់មន្ទីរពេទ្យនៅវេលាម៉ោង៩ព្រឹក ថ្ងៃទី២៥ ឧសភា ២០១៨ ហើយក្រោយពីក្រុមគ្រូពេទ្យពិនិត្យឃើញថា ស្ថានភាពអ្នកម្តាយមិនស្រួល ពិបាកនិងបង្កើតកូន។ ទើបនៅវេលាម៉ោង២រសៀលថ្ងៃដដែល ក្រុមគ្រូពេទ្យក៏សម្រេចធ្វើការវះកាត់បង្កើត ហើយជាលទ្ធផល នៃការវះកាត់នេះ ស្រាប់តែទទួលបានជោគជ័យ ប៉ុន្តែបែរជាមានរឿងភ្ញាក់ផ្អើលកើតឡើង។ ដោយសារតែទារកដែលក្រុមគ្រូពេទ្យវះកាត់បាន គឺជាទារកចំឡែក ដែលមានក្បាលមួយ ខ្លួន២ និងដៃ៤ជើង៤ ហើយពុំមាន ដុះអ្វីដើម្បីបញ្ជាក់ថា ជាស្រីឬប្រុសនោះទេ ដែលគេកម្រនិងជួបប្រទះបំផុត។ ក្រុមគ្រូពេទ្យបានបញ្ជាក់ថា ថ្វីត្បិតតែការវះកាត់ទទួលបានជោគជ័យ ប៉ុន្តែក្រោយពីចាប់កំណើតបានប្រមាណជា១ម៉ោងប៉ុណ្ណោះ ទារកចំឡែកនោះក៏បានស្លាប់បាត់បង់ជីវិតទៅវិញ។ ទន្ទឹមនឹងនោះ ក្រុមគ្រួសារ បាននាំយកសាកសពទៅធ្វើបុណ្យនៅឯស្រុកវិញ នៅក្នុងថ្ងៃដដែលនោះតែម្តង។ បច្ចុប្បន្នម្តាយទារកចំឡែកនេះ គឺនៅសម្រាកព្យាបាលមុខរបួសនៅក្នុងមន្ទីរពេទ្យបង្អែកអ្នកលឿងនៅឡើយទេ៕