រកឃើញបទល្មើសថ្មីជាច្រើនទៀត មន្ត្រីនគរបាលជាតិម្នាក់ក្នុងចំណោមបក្សពួក៤ទៅ៥នាក់ ដែលបានប្រើអំពើហិង្សាលើយុវជនម្នាក់វាយដំយ៉ាងព្រៃផ្សៃ

ភ្នំពេញ ៖ មន្ត្រីនគរបាលរូបនោះ មានឈ្មោះ សុន ពិសាល ភេទប្រុស អាយុ២៥ឆ្នាំ មានឋានន្តរស័ក្តិជាព្រិន្ទបាលឯក និងមានតួនាទី ជានាយរងផ្នែកបន្ទប់ពិសោធន៍នៅនាយកដ្ឋាននគរបាលបច្ចេសទេសនិងវិទ្យាសាស្ត្រ មានអាស័យដ្នានស្នាក់នៅផ្ទះលេខ២៦៣បេ ផ្លូវលេខ២៦១ សង្កាត់ទឹកល្អក់២ ខណ្ឌទួលគោក ។ ភាគីដែលថាជាជនរងគ្រោះឈ្មោះ អឹុម បញ្ញា ភេទប្រុស អាយុ២៤ឆ្នាំ ស្នាក់នៅផ្ទះលេខ៣៨៤ ផ្លូវលំ ភូមិរោងចក្រ សង្កាត់គោកឃ្លោង ខណ្ឌសែនសុខ ។

មន្ត្រីនគរបាលជាតិម្នាក់ក្នុងចំណោមបក្សពួក៤ទៅ៥នាក់ ដែលបានប្រើអំពើហិង្សាលើយុវជនម្នាក់វាយដំយ៉ាងព្រៃផ្សៃ កាលពីយប់ថ្ងៃទី២៤ ឧសភា នៅចំណុចផ្លូវលេខ៣៦០ កែងផ្លូវ១០៥ សង្កាត់បឹងកេងកងទី៣ ខណ្ឌចំការមន ត្រូវបាននគរបាលព្រហ្មទណ្ឌកម្រិតធ្ងន់ក្រសួងមហាផ្ទៃចាប់ខ្លួន និងបញ្ជូនទៅកាន់សាលាដំបូងរាជធានីភ្នំពេញ នៅវេលាម៉ោង១២ថ្ងៃត្រង់ថ្ងៃទី២៦ ឧសភា ក្រោមការចោទប្រកាន់ពីបទហិង្សាដោយចេតនាមានស្ថានទម្ងន់ទោស ។ តំណាងអយ្យការបានធ្វើការសាកសួរមន្ត្រីនគរបាលរូបនោះពីរថ្ងៃមកហើយ នៅមិនទាន់ចប់ទេ ដោយសារតែការសាកសួរនោះ បានរកឃើញបទល្មើសថ្មីជាច្រើនទៀត ដែលជាប់ពាក់ព័ន្ធលើសំណុំរឿងដើរវ៉ៃគេឯង ដោយតាំងខ្លួនជាប៉ូលិស និងធ្វើការងារខុសតួនាទីរបស់ខ្លួន ។

សូមបញ្ជាក់ថា ស្ត្រីឈ្មោះ វត្តី ជាបងស្រីនិងស្វាមីឱ្យដឹងថា បានជាពួកគាត់មកដល់ក្រោយហេតុការណ៍នេះ គឺបន្ទាប់ពីបានទទួលទូរស័ព្ទពីប្រជាពលរដ្ឋនៅកន្លែងកើតហេតុបានប្រាប់ថា ប្អូនប្រុសរបស់នាងត្រូវបានសមត្ថកិច្ចស្លៀកពាក់ស៊ីវិល និងម្នាក់ពាក់ឯកសណ្ឋានប៉ូលិសមានគ្នាប្រមាណ៤ទៅ៥នាក់ ព្រួតគ្នាវាយប្អូនប្រុសរបស់នាង ខណៈបានរត់ចូលទៅក្នុងហាងមួយដែលនៅក្បែរកន្លែងកើតហេតុឱ្យគេជួយក៏ត្រូវសមត្ថកិច្ចទាំងនោះចូលទៅចាប់ដល់ក្នុងហាងរួចវាយដំយ៉ាងព្រៃផ្សៃ ។

ភ្លាមៗនាងនិងស្វាមីបានជិះម៉ូតូមកដល់កន្លែងកើតហេតុ ប៉ុន្តែមិនឃើញប្អូនប្រុសនោះទេ ដោយគេប្រាប់ថា សមត្ថកិច្ចបាននាំយកទៅប៉ុស្តិ៍រដ្ឋបាលបឹងកេងកងទី៣បាត់ហើយ ភ្លាមនោះនាងនិងស្វាមី ក៏បានទៅកាន់ប៉ុស្តិ៍រដ្ឋបាលបឹងកេងកងទី៣ដែរ តែសមត្ថកិច្ចប៉ុស្តិ៍នៅទីនោះបានប្រាប់រឿងនេះសមត្ថកិច្ចក្រសួងមហាផ្ទៃ ខាងប៉ុស្តិ៍អត់ដឹងទេ ។ គ្រាន់តែនគរបាលប៉ុស្តិ៍ប្រាប់ដូច្នោះភ្លាមនាង និងស្វាមីប្រញាប់ប្រញាល់ជិះម៉ូតូទៅដល់ក្រសួងមហាផ្ទៃ ប៉ុន្តែពេលទៅដល់ឃើញតែប្អូនប្រុសរបស់នាងប៉ុណ្ណោះ កំពុងដេកហូរឈាមនៅលើម៉ូតូកង់បីឥណ្ឌាម្នាក់ឯង តែមិនឃើញសមត្ថកិច្ចដែលចាប់ខ្លួនប្អូនប្រុសរបស់នាងនោះទេ ។ ខណៈនោះរូបនាង និងស្វាមីបាននាំប្អូនប្រុសមកសង្គ្រោះបន្ទាន់នៅឯមន្ទីរព្យាបាលបាយ័នដែលនៅជិតស្ពានអាកាសក្បាលថ្នល់ ។ សាក្សីនៅកន្លែងកើតហេតុបានឱ្យដឹងថា ក្នុងពេលមានការវាយទាត់ធាក់ក្រពុលមុខនេះ បើកុំតែបានប្រជាពលរដ្ឋនៅទីនោះជួយឃាត់ កុំអីប្រហែលជាសមត្ថកិច្ចទាំងនោះវាយយុវជនរូបនោះស្លាប់បាត់ទៅហើយ ។

ជនរងគ្រោះរងរបួសធ្ងន់ត្រង់ចិញ្ចើមខាងស្តាំ និងដៃមានជាប់ខ្នោះនៅឡើយពេលនាំមកដល់មន្ទីរពេទ្យ ។ បន្ទាប់ពីគ្រូពេទ្យធ្វើការព្យាបាលរួច ក្រុមគ្រួសារយុវជនរងគ្រោះត្រូវបាននាំទៅកាន់មន្ទីរពេទ្យព្រះកុសុមៈ ។ ក្រុមគ្រួសារយុវជនរងគ្រោះបានអំពាវនាវដល់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃសុំជួយរកយុត្តិធម៌ដល់ជនរងគ្រោះផង ព្រោះក្រុមសមត្ថកិច្ចទាំងនោះ វាយជនរងគ្រោះរួចយកទៅដាក់ក្នុងក្រសួងមហាផ្ទៃដោយគ្មានការទទួលខុសត្រូវបន្តិចណាសោះ ។ ពិសេសសូមជួយស្វែងរកមុខសមត្ថកិច្ចទាំងនោះយកមកដោះស្រាយតាមផ្លូវច្បាប់ផង កុំឱ្យអាងខ្លួនមានអំណាចបុណ្យស័ក្កិចង់វាយធ្វើបាបប្រជាជនតូចតាចស្រេចតែអំពើចិត្តបែបនោះ ។

មន្ត្រីនគរបាលខាងលើនេះកំពុងស្ថិតនៅដំណាក់កាលតំណាងអយ្យការសាកសួរ ប៉ុន្តែបើទោះជាយ៉ាងណាក្តី មន្ត្រីនគរបាលរូបនោះ ទំនងមិនអាចគេចផុតពីការឃុំខ្លួនបណ្តោះអាសន្ននោះទេ ។ តាមការស្តាប់ចម្លើយពីមន្ត្រីនគរបាលម្នាក់នោះបានឆ្លើយនៅមុខសមត្ថកិច្ចនគរបាលព្រហ្មទណ្ឌក៏ដូចនៅដំណាក់កាលតំណាងអយ្យការ កាលពីថ្ងៃទី២២ ឧសភា បាននិយាយថា ឈ្មោះ ធា បានយកម៉ូតូ១គ្រឿងម៉ាកប៊ីតពណ៌ខៀវ ជាកម្មសិទ្ធិរបស់ឈ្មោះ ផេង យុត្ថាណា ភេទប្រុស អាយុ៣២ឆ្នាំទៅដាក់បញ្ចាំ ។ លុះថ្ងៃទី២៣ ឧសភា ឈ្មោះ ផេង យុត្ថាណា បានពឹងពាក់ឈ្មោះ ធា ឱ្យដើរជួយរក ទើបឈ្មោះ ធា បានណាត់ឈ្មោះ ញ៉ា (អឹុម បញ្ញា) ជួបនៅក្រោយសាលាបុរី១០០ខ្នង សង្កាត់ទឹកថ្លា ខណ្ឌសែនសុខ ។ ពេលនោះឈ្មោះ បញ្ញា បានសន្យាថានាំទៅរកឈ្មោះ ធា តែរកមិនឃើញ ។ ដូច្នោះហើយបានជាខ្លួន (សុន ពិសាល) និងបក្សពួក១ក្រុមបានទាក់ទងទៅមេខាងលើ ក៏មានបញ្ជាឱ្យនាំឈ្មោះ បញ្ញា យកទៅក្រសួងដើម្បីសាកសួរបន្តទៀត ប៉ុន្តែនៅពេលក្រុមគេ(សមត្ថកិច្ច)ដឹកឈ្មោះ បញ្ញា ដល់ចំណុចកើតហេតុ គាត់បានលោតចុះពីលើម៉ូតូ ហើយរត់ចូលហាងស៊ុបចង្កាក់ ក៏ត្រូវក្រុមសមត្ថកិច្ចតាមចាប់មកវិញធ្វើឱ្យមានការភ្ញាក់ផ្អើលនិងមានរឿងដូច្នេះតែម្តង ។ អ្នកតាមដានបាននិយាយថា នគរបាលរូបនេះបានធ្វើហួសពីតួនាទីដែលខ្លួនជាប៉ូលិសពិនិត្យ«ខ្មោច»ហើយ បែរជាមកស្រាវជ្រាវសំណុំរឿងបញ្ចាំម៉ូតូទៅវិញ ។ ក្រុមគ្រួសារយុវជនរងគ្រោះបានស្វែងរកយុត្តិធម៌ដល់សម្តេចតេជោ ហ៊ុន សែន ដោយបានបង្ហោះចូលផេកសម្តេចដោយមានខ្លឹមសារថា Honey Tey (វត្តី) សូមគោរពជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានិងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នាងខ្ញុំនិងក្រុមគ្រួសារមានទុក្ខជាទម្ងន់ដោយប្អូនប្រុសនាងខ្ញុំត្រូវបានមន្ត្រីប៉ូលិសឈ្មោះ សុន ពិសាល និងបក្សពួករួមទាំងមន្ត្រីប៉ុស្តិ៍បឹងកេងកង៣បានវាយធ្វើបាបប្អូននាងខ្ញុំ យ៉ាងធ្ងន់ធ្ងរដោយពុំមានមូលហេតុច្បាស់លាស់កាលពីថ្ងៃទី២៤ ខែឧសភា ឆ្នាំ២០១៨ វេលាម៉ោងប្រហែលជា៧ជាងវេលាល្ងាចនៅចំណុចផ្លូវ៣៦០ ។ អាស្រ័យដូចបានជម្រាបជូនខាងលើ សូមសម្តេចជួយរកយុត្តិធម៌ដល់ក្រុមគ្រួសារនាងខ្ញុំផង ដើម្បីកុំឱ្យមានមន្ត្រីខិលខូចដើរបង្កអសន្តិសុខនៅក្នុងសង្គមបែបនេះ ព្រោះឋិតនៅក្រោមការដឹកនាំរបស់សម្តេចគឺមានសន្តិភាព ជាចុងក្រោយនាងសូមជូនពរសម្តេចឱ្យមានសុខភាពល្អ អាយុវែងនិងនៅតែបន្តដឹកនាំប្រទេសកម្ពុជាឆ្ពោះទៅរកសុខសន្តិភាព សូមអរគុណ ៕ ប្រភពៈ កូន ខ្លាតូច

ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។

អត្ថបទទាក់ទង

ព័ត៌មានពេញនិយម

ព័ត៌មានថ្មីៗ

អត្ថបទ​ទាក់ទង

ព័ត៌មានពេញនិយម

ព័ត៌មានថ្មីៗ

អត្ថបទទាក់ទង