អគ្គីភ័យឆេះផ្សារកណ្ដាលអស់ចំនួន៤តូបយ៉ាងសន្ធោសន្ធៅ
-

ភ្នំពេញ៖ គ្រោះអគ្គិភ័យមួយ បានលេបត្របាក់ផ្សារកណ្ដាលក្នុងខណ្ឌដូនពេញអស់ចំនួន៤តូបទាំងស្រុង បង្កការភ្ញាក់ផ្អើលដល់ប្រជាពលរដ្ឋនិងសមត្ថកិច្ចចេញរថយន្ដពន្លត់អគ្គីភ័យជួយអន្តរាគមន៍ភ្លាមៗ កាលពីវេលាម៉ោង១២និង៤០នាទីរំលងអាធ្រាត ឈានចូលថ្ងៃទី២៩ ខែឧសភា ឆ្នាំ២០១៨ នៅចំណុចផ្សារកណ្ដាល តាមបណ្ដោយផ្លូវលេខ១៣ ស្ថិតក្នុងសង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ។

ប្រជាពលរដ្ឋដែលឃើញហេតុការណ៍បានឲ្យដឹងថា នៅមុនពេលកើតហេតុគេបានឃើញផ្សែងហុយចេញលាយលំជាមួយអណ្ដាលភ្លើងយ៉ាងសន្ធោសន្ធៅចេញពីតូបដែលមានស្លាកយីហោ ទ្រូម៉ាន់នី រួចក៏នាំគ្នាយកបំពង់ពន្លត់អគ្គីភ័យបាញ់ពន្លត់អស់ជាច្រើនបំពង់តែមិនរលត់ទើបរាយការណ៍ប្រាប់សមត្ថកិច្ចអោយជួយអន្តរាគមន៍មកជួយបាញ់ពន្លត់យ៉ាងញាប់ដៃ ញាប់ជើងតែម្ដង ។
សមត្ថកិច្ចបានអោយដឹងថា ករណីអគ្គីភ័យនេះកម្លាំងបានប្រើប្រាស់រថយន្ដពន្លត់អគ្គីភ័យចំនួន៦គ្រឿង និងប្រើប្រាស់ទឹកអស់៧ឡាន ទើបគ្រប់គ្រងស្ថានការណ៍បានទាំងស្រុង ដោយបង្កការខូចខាតអស់ចំនួន៤តូប។ ចំពោះមូលហេតុដែលបង្កអោយមានអគ្គីភ័យនេះកើតឡើង សមត្ថកិច្ចសន្និដ្ឋានថា អាចបណ្ដាលមកពីឆ្លងចរន្តអគ្គីសនី៕
ដោយៈ ភារ៉ា