រាជធានីភ្នំពេញ៖ កាលពីវេលាម៉ោង១២រសៀល ថ្ងៃទី២៦ ខែឧសភា ឆ្នាំ២០១៨ ប៉ូលិសបានទទួលពាក្យបណ្តឹង ពីស្ត្រីម្នាក់ដែលបានប្តឹងសមត្ថកិច្ចថា បុរសម្នាក់បានចាប់ចៅស្រី (ត្រូវជាកូន) របស់ខ្លួន ទើបតែអាយុ២ខួប រំលោភសេពសន្ថវៈ រហូតដល់នាងមានអាការៈឈឺចាប់យ៉ាងខ្លាំង ដោយហេតុការណ៍នេះ កើតឡើងនៅក្នុងបន្ទប់ជួល ក្នុងភូមិជ្រៃកោង សង្កាត់ចោមចៅ២ ខណ្ឌពោធិសែនជ័យ ។

បុរសដែលត្រូវបានសង្ស័យ ចាប់រំលោភចៅខ្លួនឯង មានឈ្មោះ ជឹម ចយ អាយុ៥២ឆ្នាំ មុខរបរជាកម្មករសំណង់ ស្នាក់នៅផ្ទះជួលក្នុងភូមិជ្រៃកោង សង្កាត់ចោមចៅ២ ខណ្ឌពោធិសែនជ័យ មានស្រុកកំណើត ភូមិធ្នង់ ឃុំអូរឬស្សី ស្រុកកំពង់ត្រាច ខេត្តកំពង់ឆ្នាំង ។ ក្មេងស្រីរងគ្រោះ ដែលត្រូវជីតារំលោភ មានអាយុទើបតែជាង២ខួប រស់នៅជាមួយម្តាយឈ្មោះ ផាត់ ចាន់ធូ អាយុ២៤ឆ្នាំ ជាកម្មកររោងចក្រ ស្នាក់នៅបន្ទប់ជួលក្បែរគ្នា ជាមួយជនសង្ស័យជាជីតារបស់ក្មេង ហើយមានស្រុកកំណើត ភូមិអង្កាញ់ ឃុំព្រៃកប្បាស ស្រុកព្រៃកប្បាស ខេត្តតាកែវ ហើយជាអ្នកប្តឹងជនសង្ស័យផងដែរ ។ ចំណែកជនសង្ស័យជាជីតា របស់ក្មេងស្រីរងគ្រោះ បានប្រាប់សមត្ថកិច្ចថា គាត់បានគ្នាជាមួយ ប្រពន្ធក្រោយនេះ ក្នុងរយៈពេល៥ឆ្នាំមកហើយ ហើយកូនស្រីជាដើមបណ្តឹង ជាកូនចុង ស្នាក់នៅបន្ទប់ផ្សេងគ្នា ហើយមុនសមត្ថកិច្ចឃាត់ខ្លួន នៅរសៀលថ្ងៃទី២៦ ខែឧសភានេះ ខណៈដែលគាត់កំពុងនៅផ្ទះជួល ស្រាប់តែសមត្ថកិច្ចចុះទៅឃាត់ បន្ទាប់ពីកូនស្រីចុង ប្តឹងថារំលោភចៅស្រី ។ តែទោះជាយ៉ាងណាក្តី នៅចំពោះមុខនគរបាលប៉ុស្តិ៍ ជនសង្ស័យបដិសេធ រាល់ការចោទប្រកាន់ទាំងស្រុងផងដែរ ។ ចំណែកឯស្ត្រីជាម្តាយ របស់ក្មេងស្រីរងគ្រោះ និងជាអ្នកប្តឹងបុរសខាងលើ បានប្រាប់ឲ្យដឹងថា កាលពីរសៀល ថ្ងៃទី២៥ ខែឧសភា ឆ្នាំ២០១៨ គាត់បានយកកូនស្រីរងគ្រោះខាងលើ ទៅផ្ញើជាមួយនិងជីតារបស់នាង (ឪពុកចុង) ហើយរួបគាត់បានចេញទៅធ្វើការបាត់ទៅ រហូតដល់វេលាម៉ោង៥និង៤០នាទី គាត់បានវិលត្រលប់មកពីធ្វើការវិញ ស្រាប់តែឃើញកូនស្រីគាត់ នោមមកមានឈាម គាត់ក៏នឹកងឿងឆ្ងល់ក្នុងចិត្តយ៉ាងខ្លាំង ហើយក៏បានសាកសួរកូនស្រី អាយុជាង២ខួបនោះ ហើយនាងបានប្រាប់ថា ត្រូវតាចាប់រំលោភ ហើយនាងមានការឈឺចាប់យ៉ាងខ្លាំង ។ ដោយសារតែមិនអស់ចិត្ត ស្ត្រីជាម្តាយបាននាំកូនស្រី ទៅកាន់គ្លីនិកអង្គការរ៉ាក់ ហើយពេលនោះ គ្រូពេទ្យបានប្រាប់ថា កូនស្រីគាត់មានសញ្ញារលាកប្រដាប់ភេទ ពេលនោះហើយទើបគាត់ប្រាកដក្នុងចិត្តថា ប្រាកដជាកូនស្រីរបស់គាត់ រងការរំលោភផ្លូវភេទពី ឪពុកចុងរបស់ខ្លួន (ជីតាក្មេងស្រី) ទើបនៅវេលារសៀលថ្ងៃទី២៦ ខែឧសភា ឆ្នាំ២០១៨ គាត់ក៏បានសម្រេចចិត្ត ទៅដាក់ពាក្យបណ្តឹង ប្តឹងឪពុកចុងល្មោភកាម រូបនោះតែម្តង។ ចំណែកស្ត្រីឈ្មោះ ម៉ុក ហូ អាយុ៤៩ឆ្នាំ ត្រូវជាប្រពន្ធចុងរបស់ជនសង្ស័យខាងលើ និងត្រូវជាជីដូនរបស់ក្មេងស្រីរងគ្រោះផងដែរ បានប្រាប់សមត្ថកិច្ចថា គាត់មិនហ៊ានអះអាងថា យ៉ាងណានៅឡើយនោះទេ ព្រោះមិនបានឃើញផ្ទាល់ភ្នែក ហើយកាលពីរសៀលថ្ងៃទី ២៥ ខែឧសភា ឆ្នាំ២០១៨កន្លងទៅនោះ ពេលដែលចៅស្រីដេកលក់ នៅក្នុងបន្ទប់ជាមួយជីតារបស់វា គាត់ក៏បានជិះម៉ូតូចេញទៅ ដើរទារលុយគេ រហូតដល់ល្ងាចទើបកូនស្រីរបស់គាត់ បានចេញពីធ្វើការហើយចូលក្នុងបន្ទប់ យកកូនស្រីរបស់នាង ទៅបន្ទប់នាងវិញ ។ គាត់បានបន្តថា ស្រាប់តែដល់ថ្ងៃខាងលើ ទើបបានដឹងថា កូនស្រីរបស់គាត់ បានដាក់ពាក្យបណ្តឹងប្តឹងឪពុកចុងរបស់នាង ថាបានចាប់រំលោភចៅរបស់ខ្លួនឯង ហើយគាត់ក៏មិនហ៊ានថាយ៉ាងម៉េចដែរ ទុកឲ្យគ្រូពេទ្យ និងសមត្ថកិច្ចធ្វើការស្រាវជ្រាវ ទៅតាមជំនាញរបស់ពួកគេ ហើយបើពិតដូចពាក្យបណ្តឹងនោះមែន សូមឲ្យចាត់ការទៅតាមផ្លូវច្បាប់ចុះ៕ ប្រភពៈ ណុត