ភ្នំពេញ ៖ ស្ត្រីម្នាក់រួមទាំងកូនតូចពីរនាក់បើករថយន្តសេរីទំនើបមួយគ្រឿង បោះពួយយ៉ាងលឿន ហើយរេចង្កូតទៅបុករថយន្តស៊ិនទ្រីកំពុងឈប់ប្រមូលសំរាមពីក្រោយបណ្ដាលឲ្យត្រូវកម្មករស៊ិនទ្រីម្នាក់កំពុងប្រមូលសម្រាម រងរបួសធ្ងន់ ចំណែកកូនតូចពីរនាក់ខាងរថយន្តរបួសស្រាល។

ហេតុការណ៍នេះកើតឡើងនៅវេលាម៉ោង១២ និង៥០នាទីយប់រំលងអធ្រាត ឈានចូលថ្ងៃទី៣០ ខែឧសភា ឆ្នាំ២០១៨ ស្ថិតនៅតាមបណ្ដោយផ្លូវសហពន្ធ័រុស្សុី ត្រង់ចំនុចបុរីញូថោន ក្នុងសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។ យោងតាមប្រភពពីកន្លែងកើតហេតុបានឲ្យដឹងថា​ មុនពេលកើតហេតុ គេស្ត្រីម្នាក់រួមនិងកូនតូចពីរនាក់ទៀត បានបើករថយន្តមួយគ្រឿងម៉ាកMARCH​ ពាក់ស្លាកលេខភ្នំពេញ2T-6592 ទិសដៅពីកើតទៅលិចក្នុងល្បឿនលឿន និងដោយខ្វះការប្រុងប្រយ័ត្ន ក៏រេចង្កូតទៅបុករថយន្តស៊ិនទ្រីដែលមានលេខរៀង២៨៦ ដែលកំពុងឈប់ប្រមូលសម្រាម ចំពីក្រោយពេញទំហឹង បណ្ដាលឲ្យត្រូវកម្មករស៊ិនទ្រីម្នាក់រងរបួសធ្ងន់ ឯក្មេងតូចពីរនាក់ខាងរថយន្តរងរបួសស្រាល ហើយភ្លាមៗ ជនរងគ្រោះទាំងរបួសធ្ងន់ស្រាល ត្រូវបានរថយន្តសង្គ្រោះបន្ទាន់ដឹកបញ្ជូនទៅមន្ទីរពេទ្យភ្លាមៗ ។ ក្រោយកើតហេតុ សមត្ថកិច្ចមូលដ្ឋានសហការជាមួយសមត្ថកិច្ចជំនាញ ធ្វើការវាស់វែងយករថយន្តទាំងពីរគ្រឿងទៅការិយាល័យចរាចរណ៍រាជធានីភ្នំពេញ រងចាំដោះស្រាយតាមផ្លូវច្បាប់ ៕ ដោយៈ ភារ៉ា