កាលពីពេលថ្មីៗនេះ មានហេតុការណ៍វាយគ្នាមួយ បានកើតឡើងនៅខេត្តព្រះសីហនុ ដោយជនជាតិបរទេសម្នាក់ ឈ្មោះ Paul Farrell ត្រូវបានជនជាតិចិនមួយក្រុម ព្រួតគ្នាវាយរហូតដល់បែកមាត់ បាក់ធ្មេញ ហូរឈាមកស្រោបខ្លួន នៅក្នុងបារមួយកន្លែង ក្នុងខេត្តព្រះសីហនុ ហើយព័ត៌មាននេះ ត្រូវបានកាសែតបរទេស យកទៅចុះផ្សាយថ្មីៗនេះផងដែរ ។

បើតាមការរៀបរាប់ឲ្យដឹង ពីសារព័ត៌មានបរទេសខាងលើថា ក្រុមជនជាតិចិន ដែលបានបង្កជម្លោះនោះ មុនដំបូងបានអង្គុយនៅជិត បុរសរងគ្រោះឈ្មោះ Paul ស្រាប់តែអង្គុយបានមួយសន្ទុះ ពួកជនជាតិចិន បានមើលឃើញថ្ងាសរបស់ជនបរទេសរងគ្រោះ បានសាក់អក្សរតៃវ៉ាន់ ទើបធ្វើឲ្យជនជាតិចិនម្នាក់ ក្នុងចំណោមបក្សពួក១០នាក់ បានស្រែកថា តៃវ៉ាន់, ឆាយណា ដោយចង់មានន័យថា តៃវ៉ាន់ជាផ្នែកមួយរបស់ប្រទេសចិន ។ គ្រាន់តែឮដូច្នេះ ជនបរទេសរងគ្រោះរូបនោះ បានស្រែកតបវិញថា តៃវ៉ាន់, តៃវ៉ាន់ ចង់មានន័យថា តៃវ៉ាន់គឺជាតៃវ៉ាន់ មិនមែននៅក្រោមចិននោះឡើយ ស្រាប់តែឮពាក្យប៉ុន្មានម៉ាត់នេះហើយ ទើបធ្វើឲ្យពួកចិនទាំងនោះ មានកំហឹងយ៉ាងខ្លាំង បាននាំគ្នាស្ទុះទៅព្រួតវាយ ជនបរទេសខាងលើយ៉ាងសាហាវ រហូតដល់បាក់ធ្មេញ និងហូរឈាមកក្លាក់តាមមាត់ ។ ក្រោយពីហេតុការណ៍នេះកើតឡើង ជនបរទេសដែលរងគ្រោះខាងលើ បានបង្ហោះសារនៅលើបណ្តាញសង្គមហ្វេសប៊ូក របស់ខ្លួនថា ខ្លួនសាក់អក្សរតៃវ៉ាន់ នៅលើថ្ងាសបែបនេះ តាំងពីខែតុលា ឆ្នាំ២០១៧មកម្ល៉េះ ដោយសារតែពេលនោះ គឺគាត់បានស្រវឹងខ្លាំង មិនដឹងខ្លួនទេ ហើយគាត់ក៏បានសរសេរ បង្ហាញពីការសោកស្តាយ ដែលមានរឿងអាក្រក់កើតឡើង នៅលើខ្លួនគាត់ដោយសារតែ សាក់មួយនេះ ហើយគាត់បានប្រាប់ថា នឹងលប់សាក់នេះចេញ ឲ្យអស់ចង្រៃយ៍ ៕ ប្រភពៈ NextShark