ស្រ្តីដែលយកសំរាមទៅចោលបង្ហូរតាមទឹកលើថ្នល់ ពេលមេឃកំពុងភ្លៀង ត្រូវបានមន្ទីរបរិស្ថានខេត្តព្រះសីហនុ កោះហៅ និងធ្វើការអប់រំ ពី...

ព្រះសីហនុ៖ មន្ទីរបរិស្ថានខេត្តព្រះសីហនុបានកោះហៅស្ត្រីឥតមាយាទម្នាក់ យកមកអប់រំ រឿងចាក់សំរាមចោលបង្ហូរតាមទឹកលើផ្លូវថ្នល់ ខណៈមេឃកំពុងភ្លៀង កាលពីរសៀលថ្ងៃទី២៩ ខែឧសភា ២០១៨ម្សិលមិញនេះស្ថិតផ្លូវក្រោយផ្សាមាន់ សង្កាត់ ៤ ក្រុងព្រះសីហនុ ខេត្តព្រះសីហនុ ។ ក្រោយពីមានការរងការរិះគន់ក្នុងបណ្តាញសង្គម Facebook ។

មន្ទីរបរិស្ថាន និងរដ្ឋបាលក្រុងព្រះសីហនុ យកមកអប់រំណែនាំ នៅសាលាក្រុង នាវេលាម៉ោង៩នាទីយប់ ថ្ងៃដដែលនេះ ដោយស្ត្រីរូបនោះ បានទទួលស្គាល់កំហុស ហើយសូមទោសជាសាធារណៈ និងចុះកិច្ចសន្យាឈប់ប្រព្រឹត្តនូវទង្វើបែបនេះទៀត ។ ស្ត្រីម្នាក់ដែលធ្វើសកម្មភាពចាក់សំរាមលើផ្លូវសាធារណៈ ឲ្យហូរទៅតាមទឹកភ្លៀងនោះមានឈ្មោះ ដា រ៉ែន អាយុ២៩ឆ្នាំ មានទីលំនៅស្ថិតក្រោយផ្សាមាន់ សង្កាត់៤ ក្រុងព្រះសីហនុ ខេត្តព្រះសីហនុ ។

តាមរយៈខ្សែវីដេអូខ្លី ដែលមជ្ឈដ្ឋានក្នុងហ្វេសប៊ុកបានសរសេរ Comments រិះគន់ តិះដៀលយ៉ាងចាស់ដៃ ដោយបង្ហាញពីស្រីកញ្ជើធ្លុះបោះចោលសំរាមអនាធិបតេយ្យ ឲ្យហូរតាមទឹក ពេលមានភ្លៀងម្តងៗ នៅផ្លូវខាងក្រោយផ្សារលើ ។ ពលរដ្ឋគ្រប់រូបគួរគប្បី ចូលរួមរក្សាសណ្តាប់ធ្នាប់ អនាម័យបរិស្ថានទាំងអស់គ្នា និងថាករណីបែបនេះ មិនគួរយកជាគំរូឡើយ ។

មន្ត្រីរដ្ឋបាលសាលាក្រុងព្រះសីហនុ បានឲ្យដឹងថា ស្ត្រីរូបនោះបានទទួលស្គាល់កំហុស និងបានសូមទោសជាសាធារណៈ ព្រមទាំងបានចុះកិច្ចសន្យាឈប់ប្រព្រឹត្តនូវទង្វើអាក្រក់ចាក់ចោលសំរាមគ្មានសណ្តាប់ធ្នាប់នៅតាមផ្លូវ ឬតាមទីសាធារណៈបែបនេះតទៅទៀតនាថ្ងៃខាងមុខ ៕