ចៅក្រមជំនុំជម្រះនៃសាលាដំបូងរាជធានីភ្នំពេញ ប្រកាសសាលក្រមផ្តន្ទាទោសជនជាប់ចោទឈ្មោះ វ៉ាន់ សុខសីហា ហៅហោរា អគ្គីនេត្រ ដាក់ពន្ធនាគារកំណត់រយៈពេល៣ឆ្នាំ....(មានវីដេអូ)

រាជធានីភ្នំពេញ៖ ដូចអ្វីដែលបានគ្រោងទុក នៅព្រឹកថ្ងៃទី៣០ ខែឧសភា ឆ្នាំ២០១៨នេះ លោក វ៉ាន់ សែនវិសុទ្ធ ចៅក្រមជំនុំជម្រះនៃសាលាដំបូងរាជធានីភ្នំពេញ បានបើកសវនាការ ប្រកាសសាលក្រមផ្តន្ទាទោសជនជាប់ចោទឈ្មោះ វ៉ាន់ សុខសីហា ហៅហោរា អគ្គីនេត្រ ភេទប្រុស ដាក់ពន្ធនាគារកំណត់រយៈពេល៣ឆ្នាំ និងពិន័យជាប្រាក់ចំនួន ៤លានរៀល ចូលជាថវិការដ្ឋ ពីបទជួញដូរដោយខុសច្បាប់នូវសារធាតុញៀនប្រភេទ មេតំហ្វេតាមីន (ម៉ាទឹកកក) ទម្ងន់ ២.៦៨ក្រាម។

ក្នុងសវនាការ កាលពីរសៀលថ្ងៃទី១០ ខែឧសភា ឆ្នាំ២០១៨ ជនជាប់ចោទ ហោរា អាគ្គីនេត្រ បានសារភាពថា សកម្មភាពរបស់ខ្លួនកន្លងមកជា អំពើបោកប្រាស់ ដោយសារតែខ្វះលុយចាយ និងបង់ថ្លៃផ្ទះជួលខ្លួនបាន ក៏សម្រេចបន្ថែមមុខរបរថ្មីមួយទៀត គឺជួញដូរគ្រឿងញៀន ប៉ុន្តែទីបំផុត ក៏ត្រូវជាប់គុកដោយសារ មុខរបរថ្មីនេះ។

គួររំលឹកថា ជនជាប់ចោទ ឈ្មោះ វ៉ាន់ សុខសីហា ហៅ ហោរា អគ្គីនេត្រ ត្រូវបានកម្លាំងសមត្ថកិច្ចការិយាល័យ ក៦ នៃមន្ទីរប្រឆាំងគ្រឿងញៀន ឃាត់ខ្លួននៅចំណុចបណ្តោយផ្លូវ២៧១ ខាងក្រោយវិទ្យាល័យ ជាស៊ីម សាមគ្គី កាលពីថ្ងៃទី២៧ ខែកញ្ញា ឆ្នាំ២០១៧កន្លងទៅ ពាក់ព័ន្ធ រឿង ជួញដូរគ្រឿងញៀន ប្រភេទ មេតំហ្វេតាមីន (ម៉ាទឹកកក) ទម្ងន់ ២.៦៨ក្រាម៕