ព្រះសីហនុ៖ មានករណីគ្រោះថ្នាក់ចរាចរមួយបានកើតឡើងរវាងរថយន្តកុងតឺន័រ បុករថយន្ត ម៉ាកនីសាន់ បណ្តាលឲ្យបុរសម្នាក់រងរបួសយ៉ាងធ្ងន់ធ្ងរ ដែលហេតុការណ៍នេះបានកើតឡើង នូវចំណុចចន្លោះបង្គោលគីឡូ២១១-២១២ស្ថិតក្នុងភូមិចំណោតរាម ឃុំបិតត្រាំង ស្រុព្រៃនប់ ខេត្តព្រះសីហនុ កាលពីវេលាម៉ោងប្រមាណ១២ថ្ងៃត្រង់ថ្ងៃទី៣០ ខែឧសភា ឆ្នាំ២០១៨។

បើតាមសម្តីសមត្ថកិច្ចបានប្រាប់ឲ្យដឹងថា រថយន្តកុងតឺន័រ ពាក់ស្លាកលេខព្រះសីហនុ ៣A-៤៩១៦ ទិសដៅភ្នំពេញទៅក្រុងព្រះសីហនុ (អ្នកបើកបរគេចខ្លួនបាត់) មកដល់ចំណុចកើតហេតុ រថយន្តរេចង្កូតមកឆ្វេងដៃ រួចក៍បុករថយន្ត ម៉ាកនីសាន់ ដែលមានស្លាកលេខចង្កូតស្តាំBB-០០៤៧ ទិសដៅផ្ទុយគ្នា បើកបរដោយឈ្មោះ ស៊ុន សារី ភេទប្រុសអាយុ៥៧ឆ្នាំ នៅភ្នំពេញ និងអ្នករួមដំណើរឈ្មោះ ជូ សុភី ភេទប្រុសអាយុ២៨ឆ្នាំ នៅភូមិតាអោង ឃុំអន្សោម ស្រុកកំពង់ត្របែក ខេត្តព្រៃវែង បណ្តាលអោយឈ្មោះជូ សុភី រងរបួសត្រូវបានបញ្ជូនមកព្យាបាលភ្លាមៗដែរ៕ ដោយ៖ និស្ស័យ