ភ្នំពេញ៖ រថយន្តម៉ាកហុងដាFITមួយគ្រឿង បានបើកបរក្នុងល្បឿនលឿនពេក ក៏រ៉េចង្កូតទៅបុកទ្រូងផ្លូវហើយបន្តទៅបុកក្បាលនាគពុះចែកទ្រូងផ្លូវបាក់ទាំងអស់៣កង់ បណ្តាលឲ្យរថយន្តរងការខូចខាតយ៉ាងដំណំ ។

ហេតុការ​ណ៍គ្រោះថ្នាក់ចរាចរណ៍នេះ បានកើតឡើងការពីវេលាម៉ោង ០១និង០០នាទីយប់រំលងអាធ្រាតឈានចូលថ្ងៃសុក្រ ទី១ ខែ មិថុនា ឆ្នាំ ២០១៨ ស្ថិតនៅតាមបណ្តោយផ្លូវជាតិលេខ២ ភូមិ ព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។ តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើករថយន្តម៉ាក ហុងដា FIT ពណ៌ខៀវ ពាក់ស្លាកលេខភ្នំពេញ 2E-1468 ធ្វើដំណើរតាមបណ្ដោយផ្លូវជាតិលេខ២ ទិសដៅពីជើងមកត្បូង ក្នុងល្បឿនយ៉ាងលឿន និងសង្ស័យអ្នកបើកបរស្រវឹងផង​ ក៏រ៉េចង្កូតមកបុករបាំងថ្មពុះចែកទ្រូងផ្លូវខ្ទាតចេញអស់២កង់ ហើយរថយន្តបង្កនៅមិនទាន់អស់ល្បឿន ក៏បានមកបុកក្បាលនាគបន្ថែម១កង់ទៀត បណ្តាលឲ្យរងការខូចខាតទាំងអស់៣កង់ រីឯរថយន្តបង្កវិញ​ បានរងការខូចខាតទាំងផ្នែកខាងមុខនិងខាងក្រោយយ៉ាងដំណំ ហើយភ្លាមៗនោះ ខាងភាគីខាងរថយន្តបង្កបានមកដល់កន្លែងកើតហេតុជាច្រើននាក់ និងរកហៅឡានស្ទូចមកស្ទូចយកទៅ តែត្រូវបានស​មត្ថកិច្ចមូលដ្ឋានចុះមកដល់បានឃាត់រថយន្តនៅកន្លែងកើតហេតុ ដោយហេតុការណ៏នេះដែរគឺមិនបង្កឲ្យមានអ្នករងរបួសនោះទេ ។ ក្រោយមក សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានមកស្ទូចយករថយន្តបង្កទៅរក្សាទុក ដើម្បីរងចាំដោះស្រាយទៅតាមនីតិវិធីច្បាប់ ៕