សាហាវណាស់...ដកកាំភ្លើងភ្ជង់ ប្លន់ម៉ូតូម៉ាក ឌូក មួយគ្រឿង ដោយសុវត្ថិភាព... - សង្គម សិល្បៈ កម្សាន្ដ - Khmer News - The latest Cambodia News. Khmer Times is the region's fastest growing newspaper with daily insights into Cambodia and ASEAN

សាហាវណាស់...ដកកាំភ្លើងភ្ជង់ ប្លន់ម៉ូតូម៉ាក ឌូក មួយគ្រឿង ដោយសុវត្ថិភាព...

រាជធានីភ្នំពេញ ៖ ជនសង្ស័យបានប្លន់យកម៉ូតូពីបុរសម្នាក់ ដែលទើបនឹងចេញពីជួយលក់បាយបងនៅម្តុំកែងផ្លូវ២០០៤ កាលពីវេលាម៉ោង៣ទៀបភ្លឺថ្ងៃទី១ ខែមិថុនា ឆ្នាំ២០១៨ នៅតាមបណ្តោយផ្លូវ២០០៤ (ហៅផ្លូវម៉ៃដា) ដែលស្ថិតនៅចំណុចស្តុបវត្តអង្គតាមិញ ស្ថិតនៅភូមិគោកចំបក់ សង្កាត់ចោមចៅ១ ខណ្ឌពោធិ៍សែនជ័យ។

បុរសម្ចាស់ម៉ូតូឈ្មោះ សូរ ដារ៉ូ ភេទប្រុស អាយុ២៥ឆ្នាំ មុខរបរអ្នកគិតលុយក្នុងក្លឹបមួយកន្លែង រស់នៅសង្កាត់បឹងសាឡាង ខណ្ឌទួលគោក។ ម៉ូតូមួយគ្រឿងដែលជនសង្ស័យប្លន់យកទៅបាត់ម៉ាកឌូក ពណ៌ខ្មៅ ពាក់ស្លាកលេខភ្នំពេញ ១CV-២២២២។

បើតាមសម្តីជនសង្ស័យប្រាប់ថា នៅមុនពេលកើតហេតុ គាត់និងមិត្តភក្ដិ២នាក់ ទៀតចេញពីធ្វើការបានទៅជួយលក់បាយបងនៅម្តុំកែងផ្លូវ២០០៤ ហើយបាននាំគ្នាត្រឡប់ទៅផ្ទះវិញ ដោយជិះម៉ូតូ៣គ្រឿង ក្នុងនោះម៉ូតូម៉ាកឌូកចំនួន២គ្រឿង និងម៉ូតូកូនទាមួយគ្រឿង ខណៈពេលជិះចេញបានបន្តិច មិត្តភក្តិរបស់គាត់ម្នាក់បានភ្លេចមួកសុវត្ថិភាពនៅកន្លែងលក់បាយរបស់បងនោះ ។

ភ្លាមនោះមិត្តភិក្តិរបស់គាត់ម្នាក់បានជិះម៉ូតូម៉ាកឌូកដែរតែពណ៌លឿង បានត្រឡប់ទៅយកមួកសុវត្ថិភាព ហើយនៅសល់តែគាត់ និងមិត្តម្នាក់ទៀត។ នៅក្នុងពេលគាត់កំពុងនិយាយគ្នាជាមួយមិត្តភក្ដិនោះ ស្រាប់តែមានម៉ូតូមួយគ្រឿង ម៉ាកហុងដាឌ្រីម ពណ៌ខ្មៅ មិនចាំស្លាកលេខ ជិះមកកាក់ពីមុខរូបគាត់ ហើយនិយាយថា «អែងនិយាយអី» គាត់ក៏បានឆ្លើយថា «ទេ ខ្ញុំនិយាយជាមួយគ្នាខ្ញុំទេ» ជនសង្ស័យក៏បានដកកាំភ្លើងខ្លីពីកាបូប ម៉ាករ៉ូឡូ ហើយសួរគាត់ថា «អែងស្គាល់អានេះអត់» ពេលនោះគាត់ឈប់ នឹងបញ្ឈរម៉ូតូ ហើយបំរុងដកសោម៉ូតូ តែត្រូវជនសង្ស័យនិយាយថា «អែងសាកដកសោមើល អញបាញ់សំលាប់អែងចោលឥឡូវហើយ» ។ ខណៈពេលនោះម៉ូតូពួកម៉ាក់ក៏បានដល់ ហើយក៏ជិះដេញតាមពីក្រោយ តែតាមមិនទាន់ ក៏សម្រេចចិត្តត្រលប់មកកន្លែងកើតហេតុវិញទៅ។

ក្រោយពេលកើតហេតុ បុរសម្ចាស់ម៉ូតូ និងមិត្តភក្តិបាននាំគ្នាទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលកាកាប១ តែដោយសារទីកន្លែងកើតហេតុជាប់ព្រំប្រទល់នគរបាលប៉ុស្តិ៍កាកាប១ ទើបសមត្ថកិច្ចបាននាំបុរសជាម្ចាស់ម៉ូតូខាងលើទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅ២ ដើម្បីសាកសួរ និងស៊ើបអង្កេតរកមុខសញ្ញាជនសង្ស័យប្លន់ម៉ូតូមកផ្តន្ទាទោសតាមច្បាប់ ៕