បកស្រាយហើយ! ពេជ្រ ថៃ ច្រៀងភ្លេចប៉ារ៉ូល នៅមណ្ឌលគិរីស្តាប់ហើយស្ទើរដាច់ផ្ងារនោះ តាមពិតដោយសារមូលហេតុចឹងសោះ…(មានវីដេអូ)

ថ្មីៗនេះវីដេអូច្រៀងភ្លេចប៉ារ៉ូលម្ចាស់ពាន The Voice Kids Cambodia រដូវកាលទី១ ពេជ្រ ថៃ ត្រូវបានតារាចម្រៀងហ្វេសប៊ុក ម៉ៃ សុគន្ធ រិះគន់យ៉ាងចាស់ថា៖”មិនសមម្ចាស់ពានទេ ជាម្ចាស់ប៉ោតបានសម”។

ក្រោយពីឃើញការរិះគន់ពីសំណាក់ ម៉ៃ សុគន្ធ ទៅលើក្មេងគ្មានត្រាប្រណី លោក ទឹក រតនៈ ត្រូវជាឪពុកធម៌រស់នៅសហរដ្ឋអាមេរិកបានចេញមុខបកស្រាយថា រឿងដែល ពេជ្រ ថៃ ច្រៀងភ្លេចប៉ារ៉ូលដោយសារតែពេលហ្នឹងអាកាសធាតុត្រជាក់ខ្លាំង នៅមណ្ឌលគិរី ទើបធ្វើឲ្យម្ចាស់ពានរូបនេះរឹងថ្គាមហើបមាត់ច្រៀងមិនចេញ ព្រោះមិនមានអាវរងាក្រាស់ៗសម្រាប់ពាក់ ដើម្បីទប់ទល់នឹងភាពត្រជាក់។

ការហើបមាត់ច្រៀងមិនរួចនេះហើយ ទើបធ្វើឲ្យភ្លេងទៅមុនទៅក្រោយ ខុសប៉ារ៉ូលច្រៀងដូច្នេះ។ ប្រសិនបើអាកាសធាតុមិនត្រជាក់ខ្លាំង គ្មានបញ្ហាចោតឡើយចំពោះប៉ារ៉ូល ច្រៀង ព្រោះមុនពេលឡើងតាមកម្មវិធីប្រគំតន្ត្រីម្ដង ពេជ្រ ថៃ តែងតែហាត់សមជានិច្ចមិនដែលឲ្យភ្លាំងភ្លាត់ម្ដងណាឡើយ។

“ឃើញគាត់ច្រៀងភ្លេចប៉ារ៉ូលអ៊ីចឹង ខ្ញុំក៏បានខលទៅម្ដាយគាត់ និងក្រុមការងារនៅ មណ្ឌលគិរី ហើយខាងក្រុមការងារបានប្រាប់ខ្ញុំថា អាកាសធាតុនៅទីហ្នឹងត្រជាក់ខ្លាំង ធ្វើឲ្យកូនថៃ រឹងថ្គាមច្រៀងមិនកើតព្រោះគាត់អត់មានអាវរវាងក្រាស់ៗពាក់ដូចគេ។ក្មួយដឹងស្រាប់ហើយនៅមណ្ឌលគិរី ខែ ១២ ត្រជាក់ខ្លាំងណាស់ ហើយវីដេអូហ្នឹងតាំងពីចុង ២០១៧ មិនគួរណាយកមកបើកកកាយវិញសោះ”។លោក ទឹក រតនៈ ថ្លែងបញ្ជាក់។

លោក ទឹក រតនៈ ជាវេជ្ជបណ្ឌិតចូលនិវត្តន៍ នៅសហរដ្ឋអាមេរិក បានស្គាល់ព្រមទាំងទទួល ពេជ្រ ថៃ ជាកូនធម៌បានជិត ២ឆ្នាំហើយពោលគឺចាប់តាំងពីថ្ងៃម្ចាស់ពានរូបនេះ បង្ហាញសមត្ថភាពថ្ងៃដំបូងនៅលើឆាក The Voice Kids Cambodia រដូវកាលទី១។

បន្ទាប់ពីឃើញសមត្ថភាពក្មេងភ្លាមលោក មានចិត្តអាណិតបាន ២ថ្ងៃក្រោយមកខ្លួនក៏បានទាក់ទង ទៅអង្គការលីកាដូ នៅ ខេត្ត បាត់ដំបង សុំឲ្យជួយទាក់ទងដើម្បីជួយឧបត្ថម្ភថវិកាខ្លះៗ ដល់ ពេជ្រ ថៃ បន្តិចបន្តួចដើម្បីឲ្យរូបគេបានសម្រេចក្ដីស្រមៃ។ ក្រៅពីបង្ហាញទឹកចិត្តអាណិតចំពោះ ពេជ្រ ថៃ ហើយនោះក្នុងនាមជា ឪពុកធម៌ម្នាក់លោកសុំអំពាវនាវដល់មហាជនមួយចំនួនសូមកុំរិះគន់ដល់ម្ចាស់ពានរូបនេះ បែបជាន់ពន្លិចតទៅទៀត៕