ភ្នំពេញ៖ រថយន្តCRVមួយគ្រឿង បានបើកយ៉ាងលឿនជ្រុលទៅបុក​ចំហៀងគូទរថយន្តលុចស៊ីស បណ្តាលឲ្យរថយន្តលុចស៊ីសបួងចង្កូតទៅបុកជញ្ជាំងហាងម៉ាស្សា ហ្វេប៊្សុឡឹស ធ្លុះពីម្ខាងទៅម្ខាង រងការខូចខាតយ៉ាងដំណំ រួចហើយរថយន្តបង្កបើកគេចខ្លួនបាត់ ។

ហេតុការណ៍គ្រោះថ្នាក់ចរចរណ៍ខាងលើនេះ បានកើតឡើងនៅវេលាម៉ោង០២និង០០នាទីរំលងអាធ្រាតឈានចូលថ្ងៃសៅរ៍ ទី០២ ខែ មិថុនា ឆ្នាំ ២០១៨ នៅចំណុចហាងម៉ាស្សា ហ្វេប៊្សុឡឹស តាមបណ្តោយផ្លូវ ៣១០ កែងផ្លូវ ៦៣ ស្ថិតក្នុងសង្កាត់ បឹងកេងកងទី១ ខណ្ឌចំការមន រាជធានីភ្នំពេញ ។ យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាក CRV មួយគ្រឿង ពណ៌ទឹកបិច មិនចាំស្លាកលេខ បើកបរដោយជនជាតិបរទេស​ ធ្វើដំណើរតាមបណ្តោយផ្លូវលេខ៦៣ ទិសដៅពីត្បូងទៅជើងក្នុងល្បឿនលឿន លុះមកដល់ផ្លូវបំបែកជាបួនមិនបង្អន់ល្បឿន ស្រាប់តែមានរថយន្តម៉ាក លុចស៊ីសRX-300ពណ៌ស្ក ពាក់ស្លាកលេខភ្នំពេញ2H-8103 បានធ្វើដំណើរតាមបណ្តោយផ្លូវ៣១០ ទិសដៅពីកើតទៅលិចក្នុងល្បឿនលឿនដូចគ្នា ហើយក៏ត្រូវបានរថយន្តCRVបុកចំគូទរថយន្តលុចស៊ីស បណ្ដាលឲ្យរថយន្តលុចស៊ីសរេចង្កូតទៅបុកចូលហាងម៉ាស្សា ហ្វេសប៊្សុឡឺស បណ្តាលឲ្យបែកកញ្ចក់នឹងជញ្ជឹងរងការខូចខាតយ៉ាងដំណំ រីឯរថយន្ត​លុចសុីសវិញ ក៏រងការខូចខាតផ្នែកខាងមុខស្ទើតែទាំងស្រុង ដោយបានផ្ទុះពោងសុវត្ថិភាពចំនួន២ រួមទាំងបង្កឲ្យអ្នកបើកបរនិងអ្នករួមដំណើរជាមួយរងរបួសធ្ងន់ស្រាល២នាក់។ ភ្លាមៗនោះរថយន្តបង្កម៉ាក CRV បានបើកគេចខ្លួនបាត់ស្រមោលតែម្ដង ។ ក្រោយពេលកើតហេតុ ជនរងគ្រោះភាគីខាងលរថយន្តលុចសុីសដែលរបួសធ្ងន់ស្រាល ត្រូវបានរថយន្តសាមុយដឹកយកទៅសង្គ្រោះនៅឯមន្ទីពេទ្យ​ ។ បន្ទាប់មកសម្ថកិច្ចមូលដ្ឋានបានចុះមកដល់កន្លែងកើតហេតុ ហើយដោយសារតែភាគីខាងរថយន្តលុចសុីសមិននៅកន្លែងកើតហេតុ ក៏បានទំនាក់ទំនងទៅសមត្ថកិច្ចជំនាញ ចុះមកធ្វើការវាស់វែង និងស្ទូចយករថយន្តទៅរក្សាទុកនៅការិយាល័យចរាចរណ៏ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរងចាំដោះស្រាយទៅតាមក្រោយ​៕​