បុរសម្នាក់ បានក្លែងតួនាទីជាទីប្រឹក្សាថ្នាក់ដឹកនាំ ហើយយកឈ្មោះអ្នកធំ ដើរបោកគេ នូវទឹកប្រាក់ជាង២លានដុល្លារ សមត្ថកិច្ចកំពុងតាមប្រមាញ់...

ភ្នំពេញ៖ បុគ្គលម្នាក់ដែលបានក្លែងតួនាទីជាទីប្រឹក្សាថ្នាក់ដឹកនាំ ក្នុងជួររាជរដ្ឋាភិបាលម្នាក់ បានឆបោកក្រុមអ្នកវិនិយោគជនជាតិថៃ អស់ប្រាក់ជាង២លានដុល្លារ ក្រោមរូបភាពថា យកប្រាក់នេះមកវិនិយោគបើកក្រុមហ៊ុននៅកម្ពុជា។

ចៅក្រមស៊ើបសួរសាលាដំបូងរាជធានីភ្នំពេញបានចេញដីកាឲ្យ ចាប់ខ្លួនក្រោមបទចោទ «មិនបំពេញកាតព្វកិច្ចចំពោះឧបករណ៍អាចជួញដូរបាន ដែលបានប្រព្រឹត្តទៅកាលពីថ្ងៃទី១៣ ខែធ្នូ ឆ្នាំ២០១៧។

សូមជម្រាបថា បុគ្គលនេះធ្លាប់ត្រូវបានសាលាដំបូងរាជធានីភ្នំពេញ ចេញដីកាបញ្ជាអោយចូលខ្លួនចុះថ្ងៃទី៧ ខែធ្នូ ឆ្នាំ២០១៧ ទៅបំភ្លឺនៅនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ពាក់ព័ន្ធករណី គំរាមថានឹងសម្លាប់ បទបរិហារកេរ្តិ៍ ប្រើប្រាស់ឯកសារក្លែង និងឆបោកប្រាក់ របស់ក្រុមអ្នកវិនិយោគជនជាតិថៃ។

បុគ្គលឆបោកនេះ ត្រូវបានគេស្គាល់ថាឈ្មោះ សារិន រ៉ាត់ណាត់ដាណៃ អាយុ៣៦ឆ្នាំ បានធ្វើការឆបោកអ្នកវិនិយោគជនជាតិថៃមួយក្រុម ដែលរស់នៅក្នុងប្រទេសថៃ។ បុគ្គលឆបោកនេះបានប្រើប្រាស់ឈ្មោះថ្នាក់ដឹកនាំក្នុងជួររដ្ឋាភិបាលកម្ពុជា ដោយយកលេសថា ស្គាល់អ្នកធំនេះ អ្នកធំនោះ ក្នុងន័យធ្វើយ៉ាងណាឲ្យក្រុមអ្នកវិនិយោគជនជាតិថៃ មានទំនុកចិត្តផ្តល់លុយរហូតដល់ជាង២លានដុល្លារដល់ខ្លួន ដើម្បីអាចមករកស៊ីនៅកម្ពុជា។ ការឆបោកនេះគឺចាប់ផ្តើមក្នុងអំឡុងឆ្នាំ២០១៧ ហើយបច្ចុប្បន្នបុគ្គលខាងលើនេះ បានរត់គេចខ្លួនពីប្រទេសកម្ពុជា។

បើតាមអ្នកវិនិយោគជនជាតិថៃ បានឲ្យដឹងថា បុគ្គលខាងលើនេះក៏កំពុងរងពាក្យបណ្តឹងពីអ្នកវិនិយោគជនជាតិថៃផ្សេងនៅប្រទេសថៃ ហើយតុលាការនៅ ប្រទេសថៃ ក៏កំពុងស្វែងរកចាប់ខ្លួនបុគ្គលនេះផងដែរ។ ក្រុមអ្នកវិនិយោគថៃ បានធ្វើការអំពាវនាវដល់សាធារណៈបើសិនជាបានឃើញបុគ្គលរូបនេះ ហើយរាយការណ៍រហូតឈានទៅចាប់បានជនឆបោកនេះ ពួកគេនឹងមានការជូនជាសាគុណជាទឹកប្រាក់ ជាច្រើនគួរជាទីគាប់ចិត្ត៕