លោក WILLIAM ANH NGUYEN ត្រូវបានតុលា ប្រទេសវៀតណាម ចោទប្រកាន់ពី បទញុះញង់ពួកបាតុករ ឲ្យបំផ្លាញទ្រព្យសម្បត្តិ សាធារណៈ

ប្រទេសវៀតណាម៖ តាមប៉ូលិសក្រុងហូជីមិញនិយាយនាយប់ថ្ងៃទី១៥ មិថុនាថា លោក WILLIAM ANH NGUYEN ជាកម្មវត្ថុនៃការស៊ើបអង្កេតមួយពីបទប្រព្រឹត្តសកម្មភាពនានាដែលធ្វើឲ្យប៉ះពាល់ដល់សណ្ដាប់ធ្នាប់សាធារណៈ និងជាប់ចោទពីបទញុះញង់ពួកបាតុករឲ្យបំផ្លាញទ្រព្យសម្បត្តិសាធារណៈ។ រូបគេនឹងត្រូវឃុំខ្លួន ហើយជាប់ការឃុំឃាំងរហូតដល់ចប់ការស៊ើបអង្កេត។

លោក WILLIAM ANH NGUYEN អាយុ៣២ឆ្នាំ ត្រូវចាប់ខ្លួនកាលពីថ្ងៃទី១០ មិថុនា នៅក្រុងហូជីមិញ នាឱកាសនៃបាតុកម្មមួយក្នុងចំណោមបាតុកម្មប្រឆាំងគម្រោងច្បាប់ដ៏ចម្រូងចម្រាស់មួយស្ដីពីការបង្កើតតំបន់សេដ្ឋកិច្ចពិសេស។ ពួកបាតុករបានចោទប្រកាន់រដ្ឋាភិបាលថា គ្រោងផ្ដល់ឲ្យចិននូវដីធ្លីទាំងឡាយក្នុងតំបន់នោះរយៈពេលយូរ។

កាសែតផ្លូវការរបស់ប៉ូលិសក្រុងហូជីមិញ សរសេរថា ក្រោយពីឃើញមនុស្សម្នាទាំងឡាយប៉ុនប៉ងលើកក្រឡាប់រថយន្តប៉ូលិស ដើម្បីបើកផ្លូវឲ្យពួកបាតុករសម្រុកចូល លោក WILLIAM ANH NGUYEN បានចូលរួមដៃជាមួយពួកបាតុករលើកក្រឡាប់រថយន្តទាំងឡាយ។ បុរសអាមេរិករូបនេះកើតនៅរដ្ឋតិចសាស់ ហើយបានមកសម្រាកវិស្សមកាលនៅវៀតណាម ។ ហើយនាខែកក្កដា រូបគេត្រូវទទួលសញ្ញាបត្រអនុបណ្ឌិតនៅសិង្ហបុរី ។ បណ្ដាមិត្តភក្ដិរបស់ជននេះអះអាងថា រូបគេរងរបួស មុនពេលត្រូវចាប់ខ្លួន។ តែតាមបណ្ដាញសង្គមគេឃើញរូបគេមានឈាមហូរចេញពីក្បាល ហើយត្រូវបណ្ដាមនុស្សស្លៀកពាក់ស៊ីវិលនាំចូលរថយន្តមួយគ្រឿង។

ក្រុងហូជីមិញនាថ្ងៃទី១៦ មិថុនា ស្ថិតក្រោមការតាមឃ្លាំមើលរបស់ប៉ូលិស។ នាសប្ដាហ៍មុន អាជ្ញាធរបានណែនាំតាមរយៈខិតប័ណ្ណកុំឲ្យប្រជាជនចូលរួមក្នុងបាតុកម្មខុសច្បាប់នានា។ ហើយនៅតាមកន្លែងជាច្រើនបាតុកម្មផ្ទុះឡើងដោយហិង្សា ពិសេសក្នុងខេត្ត BINH THUAN ភាគខាងត្បូងវៀតណាម ដែលនៅទីនោះរថយន្តទាំងឡាយរបស់ប៉ូលិសត្រូវដុតបំផ្លាញចោល និងអគារសាធារណៈជាច្រើនរងការខូចខាត។ ចំណែកការសរុបបាតុករប្រមាណជាជាង៤០នាក់នៅជាប់ឃុំឃាំង ។ គម្រោងច្បាប់ពុំបានចែងជាពិសេសពីការវិនិយោគរបស់ចិនឡើយ ក្នុងតំបន់ពិសេសដែលគ្រោងបង្កើត ប៉ុន្តែបង្កឲ្យមានប្រតិកម្មយ៉ាងខ្លាំងហើយផ្ទុះបាតុកម្មប្រឆាំងចិនក្នុងប្រទេស ៕