កំពង់ស្ពឺ៖ កាលពីថ្ងៃទី២៤ ខែមិថុនា ឆ្នាំ២០១៨ វេលាម៉ោង ១៥និង៣០នាទី បុរសវ័យចំណាស់ពីរនាក់ បាននំាកូនចៅ ដើរកម្សាន្តតំបន់ទេសចរទឹកធ្លាក់ជ្រាវ បន្ទាប់ពីត្រឡប់មកពីជ្រាវវិញ ក៏ឆ្លៀតចូលលេងទឹកស្ទឹង ខណៈមេឃធ្លាក់ភ្លៀងយ៉ាងខ្លាំង បណ្តាលឲ្យហូរគួច លង់ស្លាប់ នៅត្រង់ចំណុច នៅក្នុងស្ទឹងក្រាំងពន្លៃ ចំណុចដើមជ្រៃធំ ស្ថិតក្នុងភូមិតាំងសំរោង ឃុំអមលាំង ស្រុកថ្ពង ខេត្តកំពង់ស្ពឹ។

យោងតាមប្រភពព័ត៌មាន ពីមន្ត្រីនគរបាល បានឲ្យដឹងថា មានមនុស្ស ២នាក់ បានលង់ទឹកស្លាប់ នៅត្រង់ចំណុចដូច ខាងលើ ដោយជនរងគ្រោះ មានឈ្មោះដូចខាងក្រោម ១-ឈ្មោះ មុំ សេង ភេទប្រុសអាយុ ៦០ ឆ្នាំនៅភូមិសាលាលេខ ៥ ឃុំសាលាលេខ ៥ ស្រុកកំពង់ត្រឡាច ខេត្តកំពង់ឆ្នាំង។ ២-ឈ្មោះ គឺម ផាន់ ភេទប្រុសអាយុ ៦១ ឆ្នាំ នៅភូមិថ្នល់ ឃុំអមលាំង ស្រុកថ្ពង ខេត្តកំពង់ស្ពឺ ។ មុនពេលកើតហេតុ ជនរងគ្រោះ ឈ្មោះ មុំ សេង បាននាំកូនចៅនិងសាច់ញាតិ ទៅលេងតំបន់ទេសចរណ៍ទឹកធ្លាក់ជ្រាវ បន្ទាប់ពីត្រឡប់មកពីជ្រាវវិញ ក៏ឆ្លៀតចូលលេងស្ទឹងខាងក្រោយចំការក្រូច ឈ្មោះគឹម ផាន់ ជាមួយបងប្អូនកូនចៅ និងសាច់ញាតិ ក៏ចូលលេងក្នុងទឹកស្ទឹងជាធម្មតា ។ លុះដល់ម៉ោងកើតហេតុខាងលើ ក៏មានភ្លៀងធ្លាក់ជាខ្លាំង បន្ទាប់មកក៏មាន ទឹកភ្លៀងហូរពីខាងលើយ៉ាងខ្លាំង បានបោកជនរងគ្រោះឈ្មោះ មុំ សេង ពេលឃើញដូចនេះ ឈ្មោះ គីម ផាន់ ក៏បានស្ទុះលោតទៅជួយ តែបានទឹកបោកបាត់ខ្លួនទាំងពីរនាក់តែម្ដង។ ក្រោយពេលកើតហេតុ​ កម្លាំងប៉ុស្តិ៍អមលាំង ដោយសហការជាមួយ ប្រជាការពារ ដែលការពារនៅទីនោះបានអន្តរាគមន៍ ចុះរាវរករហូតដល់ម៉ោង ១៧-៣០នាទី ទើបរកឃើញសព នៅចំណុចក្រោមស្ពានភូមិទឹកចេញ ចម្ងាយ ២០០ម៉ែត។ សមត្ថកិច្ចមូលដ្ឋាន ក្រោយពីជួយរកសពឃើញ ក៏បានប្រគល់ជូនសាច់ញាតិ យកទៅធ្វើបុណ្យតាមប្រពៃណី នៅស្រុកកំណើតរៀងៗខ្លួន ៕ មានវីដេអូ៖ ដោយ៖ និស្ស