ទាក់ទិននឹងរឿងរ៉ាវក្មេងៗ ចំនួន១២នាក់ រួមនិងគ្រូបង្វឹកម្នាក់ ដែលបានបាត់ខ្លួននៅក្នុងរូងភ្នំ ដ៏អាថ៍កំបាំង នៅក្នុងខេត្តឈៀងរ៉ៃ អស់រយៈពេល៦ថ្ងៃមកនេះ នៅមិនទាន់ទទួលបានលទ្ធផលជាដុំកំភួននៅឡើយទេ។

នៅក្នុងដំណើរនៃការស្វែករកកូនប្រុស ក៏មានលោកអ៊ុំអាយុ៥៥ឆ្នាំម្នាក់​ឈ្មោះ លោក Thinnakorn Boonpiem ដែលត្រូវជាឪពុក​របស់​ក្មេង​ប្រុសម្នាក់ ដែលបានបាត់ខ្លួននៅក្នុងរូងនោះ នៅតែមិនទាន់បានដឹងអ្វីទាល់តែសោះពីកូនប្រុស ដោយគាត់នឹងគ្រួសារកំពុងរង់ចាំដំណឹងយ៉ាងអន្ទះសា​របំផុត។ បុរសចំណាស់ខាងលើ បានរៀបរាប់ទាំងទឹកមុខស្រងូតស្រងាត់ ថា "ខ្ញុំ​ពិត​ជា​បារម្ភ​ខ្លាំង​ណាស់។" ឪពុក​ក្មេង​ប្រុស​នេះ​បន្ថែម​ថា "ខ្ញុំ​ទទួល​ដំណឹង​ថា​កូន​របស់​ខ្ញុំ​ជាប់​ក្នុង​រូង​ភ្នំ​នៅ​ម៉ោង​ប្រហែល ៩​យប់ ហើយ​ចាប់​តាំង​ពី​ពេល​នោះ​មក ខ្ញុំ​នៅ​តែ​រង់​ចាំ​កូន​នៅ​មុខ​រូង​ភ្នំ​រហូត​មក​ដល់​ថ្ងៃ​នេះ។" ទោះ​យ៉ាង​ណា​ក៏​ដោយ អ្នក​នាំ​ពាក្យ​រដ្ឋាភិបាល​ឲ្យ​ដឹង​ថា នាយករដ្ឋមន្ត្រី​ថៃ លោក ប្រាយុទ្ធ​ ចាន់អូចា នឹង​ធ្វើ​ដំណើរ​ទៅ​ទី​នោះ ដើម្បី​ផ្ដល់​ជា​កម្លាំង​ចិត្ត​ដល់​ក្រុម​គ្រួសារ​ក្មេង​ៗ​ដែល​បាត់​ខ្លួន និង​ក្រុម​អ្នក​ជួយ​សង្គ្រោះ​ទាំង​អស់៕ ប្រភព៖ Straitstimes ដោយ៖ ខុនស