ភ្នំពេញៈ កាលពីវេលាម៉ោង១២ថ្ងៃត្រង់ ថ្ងៃទី១៧ ខែសីហា ឆ្នាំ២០១៨ នៅចំណុចផ្ទះជួលនៅក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ។ បុរសម្នាក់មានឈ្មោះសុខ អាយុ៣៤ឆ្នាំ មុខរបរបរត់ម៉ូតូឌុប ក្នុងស្ថានភាពស្រវឹងជោគជាំ ស្ទុះទៅវាយយុវជន២ម្នាក់ ជាមេជាង និងកូនជាង កំពុងឈរស្ងៀម បណ្តាលឲ្យរងរបួស ។

ប្រភពនៅក្បែរនោះបានឲ្យដឹងថា មុនកើតហេតុជនបង្កបានអង្គុយផឹកស៊ីជុំគ្នា ជាមួយមិត្តចំនួន៣នាក់ តែមិនដឹងមានគំនុំអ្វីទេ លុះពេលស្រវឹងស្រាប់តែស្រែកបោះពាក្យសម្តីថា បើអញវ៉ៃកូនជាងហ្អែងម្នាក់ អស់ប៉ុន្មានលុយហា៎ និយាយមិនផុតពីមាត់ផង ជនបង្កស្ទុះទៅវាយ និងច្របាច់កជនរងគ្រោះ ដែលកំពុងឈរមើលគេជល់មាន់។ ភ្លាមនោះបុរសជាមេជាម៉ាស៊ីនត្រជាក់ ស្ទុះទៅជួយ ក៏ត្រូវជនបង្កវាយចំច្រមុះ១ដៃ បែកអំពិលអំពែក ថែមទាំងយកកាំបិតប្រុងចាក់សម្លាប់ទៀត តែជនរងគ្រោះទាំង២ រត់គេចផុត។ ក្រោយកើតហេតុជនរងគ្រោះ បានដាក់ពាក្យប្ដឹងនគរបាលឃាត់ខ្លួនជនបង្ក យកទៅសាកសួរ៕