ខេត្តកណ្ដាលៈ នៅ​ថ្ងៃទី​១៧ ខែសីហា ឆ្នាំ២០១៨នេះ លោក​គឹម ម៉េង ប្រធាន​ក្រុមប្រឹក្សា​ជំនុំជម្រះ ​សាលាដំបូង​ខេត្តកណ្ដាល បានប្រកាស​សាលក្រម​ផ្តន្ទាទោស​ជនជាប់ចោទ​ចំនួន៥​នាក់ ឲ្យត្រូវជាប់គុកចន្លោះ​ពី​៤​ឆ្នាំទៅ​៧​ឆ្នាំ ពាក់ព័ន្ធ​ការទទួល​ទិញ​ម៉ូតូ​ចោរ​យ៉ាង​កក្រើក​។

គួរ​បញ្ជាក់ថា ប្រតិបត្តិ​ការបង្ក្រាប​នេះ ក្រោយ​កម្លាំង​នគរបាល ស្រុក​កណ្តាលស្ទឹង ឃាត់ខ្លួន​ក្រុមចោរ​ធាក់​ផ្តួល​ម៉ូតូ​ប្លន់​បាន​៦​នាក់ ក្រោយ​ពួកគេ​ធ្វើ​សកម្មភាព វាយ​ប្លន់​ជនរងគ្រោះ​ពីរ​នាក់​ប្តី ប្រពន្ធ​កាលពី​ថ្ងៃទី​១០ ខែកុម្ភៈ ឆ្នាំ​២០១៨ នៅ​ចំណុច ដី​ភូមិ​ព្រែក​អ​ង្គុ​ញ ឃុំ​សៀមរាប ស្រុក​កណ្តាលស្ទឹង ខេត្តកណ្តាល​។​ ក្រោយ​កើតហេតុ ​កម្លាំង​នគរបាល​ តាម​បង្ក្រាបបាន​មុខសញ្ញា​៦​នាក់ ធ្វើការ​ដកហូត បាន​ផ្លាកលេខ​ម៉ូតូ​បាន​ចំនួន​៣​។ ​ក្រោយ​ធ្វើការ​ស្រាវជ្រាវ ឃាត់​បាន​ជនសង្ស័យ​ទាំង​៦​នាក់ រួច​នាំមក​សាកសួរ ទើប​ថា​មាន​បក្ខពួក​មួយចំនួន​ទៀត​នៅ​ខេត្តកំពង់ឆ្នាំង និង​ខេត្តកំពង់ស្ពឺ ដោយមាន​ការឯកភាព ពី​អគ្គ​នគរបាលជាតិ​និង​មាន​ដឹកនាំ​ដោយផ្ទាល់​ពី​លោក ឯក ស៊ុន​រស្មី ព្រះរាជអាជ្ញារង​អម​សាលាដំបូង​ខេត្តកណ្តាល នៅ​ថ្ងៃទី​១៣ ខែមីនា ឆ្នាំ​២០១៨ បាន​ចុះទៅ​សហការ ជាមួយ​កម្លាំង​នគរបាល​ខេត្ត​ ទាំងពីរ​ខេត្ត ​ធ្វើការ​ស្រាវជ្រាវ ឆែកឆេរ​ទីតាំង​ទទួល​ទិញ លក់​ម៉ូតូ ទទួលផល​ចោរកម្ម​ចំនួន​៥​គោលដៅ ​រកឃើញ​ម៉ូតូ​មិន​ប្រក្រតី​ជាច្រើន​គ្រឿង​៕