ខេត្តប៉ៃលិនៈ កាលពីវេលាម៉ោង១៤ៈ០០នាទីរសៀល ថ្ងៃទី០២ ខែកញ្ញា ឆ្នាំ២០១៨ ស្ថិតក្នុងភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។ សមត្ថកិច្ចធ្វើការឃាត់ខ្លួនបុរសម្នាក់ ភ្លាមៗបន្ទាប់ពីធ្វើសកម្មភាពវាយកំទេចទ្រព្យសម្បត្តិមួយចំនួន ក្នុងគ្រួសារខណៈខឹងនឹងម្តាយស្តីបន្ទោសបន្តិចបន្តួច។

បើតាមសមត្ថកិច្ចបានឲ្យដឹងថា បន្ទាប់ពីទទួលពាក្យបណ្តឹងពីស្ត្រីម្នាក់មានឈ្មោះ សុទ្ធ ញី ភេទស្រី អាយុ ៦៧ឆ្នាំ ត្រូវជាម្តាយជនបង្ក សមត្ថកិច្ចបានចុះទៅដល់កន្លែងកើតហេតុ នឹងបានឃាត់ខ្លួនបុរសម្នាក់ មានឈ្មោះ គឹម​ មិថុនា ភេទប្រុស អាយុ ២៩ឆ្នាំ មុខរបរកសិករ អ្នកទាំងពីររស់នៅភូមិឃុំកើតហេតុខាងលើ។ ក្នុងករណីនេះបណ្ដាលឲ្យខូចខាតសម្ភារៈមួយចំនួនដូចជា ទូកញ្ចក់ចំនួន២ ទ្វាបន្ទប់១ និងដកហូត​ពូថៅបាន ១ ដែលជនបង្កប្រើក្នុងករណីខាងលើ។ បច្ចុប្បន្នជនសង្ស័យ ត្រូវបានឃាត់ខ្លួននៅអធិការដ្ឋាននគរបាលស្រុកសាលាក្រៅ ដើម្បីចាត់ការតាមនីតិវិធី ៕