កំពង់ស្ពឺ ៖ មានករណីដ៏ចំឡែកមួយ បានធ្វើឲ្យមានការភ្ញាក់ផ្អើលយ៉ាងខ្លាំង ដោយនារីម្នាក់បានប្តឹងទាមទារសំណងពីបុរសជិត២ភូមិ ដោយនារីរងគ្រោះចោទ​ពី​បទ​រំលោភ​សេពសន្ថវៈរហូតនាងមានផ្ទៃពោះ កាលពី​រសៀល​ថ្ងៃ​ទី​៣ ខែកញ្ញា ឆ្នាំ ២០១៨ នៅឃុំ ​បរ​សេដ្ឋ ស្រុក ​បរ​សេដ្ឋ ខេត្តកំពង់ស្ពឺ ។ ក្រោយបែកធ្លាយករណីនេះមកលោកស្រីងិនសុគន្ឋាស្នងការរងនគរបាលខេត្តទទួលបន្ទុកប្រឆាំងការជួញដូរនិងការពារអនីតិជនបានដឹកនាំកម្លាំងជំនាញចុះដល់ភូមិកើតហេតុដើម្បីបើកការស្រាវជ្រាវរកមូលហេតុពិតក៏ដូចជារកយុត្តិធម៌ដល់អ្នករងគ្រោះផងដែរ។

ហេតុការណ៍ដ៏ចំឡែកមួយនេះ ត្រូវបានបែកធ្លាយ និង ធ្វើ​ឲ្យគេមានការ​​ហួសចិត្ត បន្ទាប់​ពី​នារីម្នាក់មាន​ផ្ទៃពោះ ​ដោយ​រក​មុខ​ឪពុក​របស់កូន​ក្នុង​ផ្ទៃ​មិនឃើញ តែនៅពេលម្តាយមីង​ជជីក​សួរ​ដេញដោល​ នារីរូបនោះទើប​ធ្លាយ​ការ​ពិត​ថា រូបនាងត្រូវបាន​បុរស​ជិត២ភូមិបបួល​រួមរ័ក្សជា​ថ្នូរ​នឹង​ការ​ឲ្យ​លុយ​បន្តិចបន្តួចដើម្បី​ដោះស្រាយ​ចំណង់​របស់​ពួក​គេ ។ ក្រោយពី​ការ​រួមរ័ក្ស នាង​ទទួល​បាន​លុយ​ពី​ប្រុស​ៗ​ទាំងនោះ​ ខ្លះ​ឲ្យ១.០០០​​រៀល ខ្លះ​៥.០០០​រៀល ខ្លះ​ទៀត​១០.០០០​រៀល​​ក៏​មាន ។ បើតាមសម្តីម្តាយមីងបានប្រាប់ឲ្យដឹងថា ម្តាយមីងតែងតែសង្កេតឃើញពោះ​របស់​នាង​ធំ​ខុស​ពី​ធម្មតា ក៏​ជជីក​សួរនាំ​ ទើប​នាង​និយាយ​ប្រាប់​ពី​ក្រុម​ប្រុស​ៗ​ក្នុងភូមិ​ និង ​ក្រៅ​ភូមិ​បាន​ប្រព្រឹត្ត​មក​លើ​នាង ។ បន្ទាប់​ពី​សួរនាំ​ហើយ ទើប​ក្រុម​គ្រួសារ​នាំ​នាង​ទៅ​ពិនិត្យ ​និង ​ដឹង​ថា​ នាង​មាន​ផ្ទៃពោះ​៥​ទៅ​៦​ខែ​ទៅ​ហើយ ។ នៅចំពោះមុខសមត្ថកិច្ចស្ត្រី ឈ្មោះ ង៉ែតសៅយុទ្ធ អាយុប្រហែល៣៤ឆ្នាំ រស់ ភូមិឃុំខាងលើបានរៀបរាប់ថានាងត្រូវបានបុរសជាច្រើនធ្វើការរួមភេទជាមួយនាងភាគច្រើននៅតាមភ្លឺស្រែ តាមគុម្ពោតព្រៃជាដើម ក្នុងនោះនាងស្គាល់មុខច្បាស់គ្រប់គ្នា។ បើ​តាម​ស្ត្រី​ជា​បងរបស់ស្ត្រីរងគ្រោះបាន​និយាយ​ថា កាលពី​អំឡុង​ឆ្នាំ​ ២០០៦ ប្អូនស្រី​របស់គាត់​នេះ​ទើប​មាន​អាយុ ប្រមាណជា ​១៦ ​ឆ្នាំបាន​ទៅ​ស៊ីឈ្នួល​ចាំចម្ការ​ឲ្យ​គេ ក៏​ត្រូវ​សាច់ញាតិ​ខ្លួនឯង ចាប់រំលោភ ហើយ​វាយ​ប្រុង​សម្លាប់​បំបិទមាត់​ទៀត ហើយសាច់ញាតិល្មោភកាមរូបនោះ ក៏បានរត់គេចខ្លួន​ទៅ​ស្រុក​ថៃ​បាត់​ទៅ ។ ក្រោយជួបហេតុការណ៍អាក្រក់បែបនេះក្រុមគ្រួសារបានបញ្ជូននាងទៅសង្គ្រោះនិងព្យាបាលរហូតជាសះស្បើយពីអាការៈរបួស ស្រាប់តែនាងមានសតិមិនប្រក្រតី(សរសៃប្រសាទ)ចាប់តាំងពីពេលនោះរហូតមក។ គ្មានអ្នកណាមួយក្នុងក្រុមគ្រួសារដឹងថា ក្រោយនាងមានជំងឺសរសៃប្រសាទហើយនាងបែរជាមកជួបរឿងអកុសលបែបនេះទៀត ។ មុន​ពេល​រឿង​នេះ ត្រូវបាន​បែកធ្លាយ មាន​មនុស្ស​មិន​តិច​ជាង​៣០​នាក់​ទេ បាន​យក​លុយ​ទៅ​បង់​ឲ្យម្តាយ​ស្ត្រី​ខាងលើ​ក្នុង​ម្នាក់​ៗ​ចាប់ពី​៤០​ម៉ឺន​ ទៅ​១​លាន​រៀល ។ ករណី​នេះ​ដែរ ក៏​មាន​មនុស្ស​មួយ​ចំនួន​បាន​ប្រកែក​ដោះសា​ថា មិន​បាន​ប្រព្រឹត្តទេ តែ​បែរជា​ព្រម​បង់លុយ​ ព្រោះ​ហេតុផល​ខ្មាស​គេ ​និង មិនចង់ឲ្យមានរឿង លេចឮវែងឆ្ងាយ ។ ជុំវិញករណីនេះសមត្ថកិច្ច​កំពុងធ្វើការ​ស្រាវជ្រាវ ​និង ​ស៊ើបអង្កេត​យ៉ាង​យកចិត្តទុកដាក់​បំផុត ។ សូមរំលឹកថានាងត្រូវបានក្រុមមនុស្សអគតិធ្វើបាបនាងចាប់តាំងពីអំឡុងឆ្នាំ២០០៦មកម្លេះគឺក្រោយពេលដែលនាងជាសះស្បើយនិងរងនូវការចាប់រំលោភរហូតដល់បច្ចុប្បន្ន។មិនដឹងថាតើឈាមនៅក្នុងផ្ទៃនាងជាឈាមរបស់អ្នកណានោះទេ ព្រោះតាមការរៀបរាប់របស់នាងគឺមនុស្សប្រុសច្រើននាក់ណាស់ដែលបានរួមមេត្រីនឹងនាង។