បងប្អូនដែល រស់នៅតាមបន្ទប់ជួល មេត្តាប្រុងប្រយ័ត្នផង មនុស្សឥឡូវពិបាកទុកចិត្តណាស់!!! ចាប់ឃាត់ខ្លួនបុរសម្នាក់ បន្ទាប់ចូលលួចកាបូបលុយ ក្នុងបន្ទប់ជួល អ្នកនៅជិតគ្នា
ភ្នំពេញៈ កាលពីថ្ងៃទី០៦ ខែកញ្ញា ឆ្នាំ២០១៨ ស្ថិតនៅបន្ទប់ជួល ក្រុម២ ផ្លូវបេតុង ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។ កំលាំងប៉ុស្តិ៍រដ្ឋបាលភ្នំពេញថ្មី បានធ្វើការឃាត់ខ្លួនជនសង្ស័យម្នាក់ មានឈ្មោះ ពេជ្រ ធី ភេទប្រុស អាយុ២៥ឆ្នាំ មុនរបរមិនពិតប្រាកដ ស្នាក់នៅបន្ទប់ជួលលេខ៣ ក្រុម៤ ផ្លូវបេតុង ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ (មានសារធាតុញៀន)។ បានធ្វើសកម្មភាព ចូលលួចយកកាបូបប្រាក់ របស់នារីម្នាក់ មានឈ្មោះ សាត សំរ៉ស់ ភេទស្រី អាយុ៣៤ឆ្នាំ មុនរបរលក់ដូរ ស្នាក់នៅបន្ទប់ជួលលេខ៤ ក្រុម៤ ផ្លូវបេតុង ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
សម្ភារៈដែលជនសង្ស័យលួចរួមមានៈ កាបូបស្ពាយពណ៌ឈាមជ្រូក១ ប្រាក់ដុល្លារ១៧០ដុល្លារ លុយខ្មែរចំនួន៥០០.០០០រៀល ទូរសព្ទ័ដៃ១គ្រឿង ម៉ាកសាំសុង និងខ្សែដៃ១ខ្សែ (ប្រគល់ឲ្យជនរងគ្រោះវិញ) ។ មុនពេលកើតហេតុ ជនសង្ស័យបានធ្វើសកម្មភាព លួចចូលក្នុងបន្ទប់របស់ជនរងគ្រោះ លួចយកកាបូបប្រាក់ រួចជនសង្ស័យបានចេញពីក្នុងបន្ទប់ជនរងគ្រោះ ទៅបន្ទប់ជួលរបស់ខ្លួនវិញ ដែលនៅជាប់គ្នា។ បន្ទាប់មកជនរងគ្រោះ បានចូលលក្នុងបន្ទប់របស់ខ្លួនឃើញបាត់កាបូបប្រាក់ពីក្នុងបន្ទប់ ក៏មានការសង្ស័យទៅលើជនសង្ស័យ ហើយជនរងគ្រោះបានទៅសួរនាំ តែជនសង្ស័យបានរត់ពេលឃើញជនរងគ្រោះនិងក្រុមគ្រួសារមកសួរនាំ។ ឃាត់ខ្លួនជនសង្ស័យប្រគល់ឲ្យសមត្ថកិច្ចប៉ុស្តិ៍រដ្ឋបាលភ្នំពេញថ្មី ធ្វើការសាកសួរ រួចជនរងគ្រោះបានដាក់ពាក្យបណ្តឹងចោទប្រកាន់ជនសង្ស័យតែម្តង ៕
ហាមដាច់ខាតការយកអត្ថបទ ពីវេបសាយ khmernews.news ដោយគ្មានការអនុញាត។