ជប៉ុន៖ កាលពីពេលថ្មីនេះ ប្រទេសជប៉ុនកំពុងរងគ្រោះដោយគ្រោះធម្មជាតិ ដោយសារតែព្យុះសង្ឃរាដែលមានឈ្មោះថា Jebi ។ យោងតាមសារព័ត៌មាន Kyodo News គិតត្រឹមល្ងាចថ្ងៃពុធ ចំនួនអ្នកស្លាប់ក្នុងគ្រោះធម្មជាតិនេះមានចំនួន ១១នាក់ ជាមួយគ្នានេះដែរ មនុស្សសរុបចំនួន ៦១០នាក់ បានទទួល រងរបួសនៅតាមខេត្តចំនួន២៨ ក្នុង ចំណោមខេត្តទាំង ៤៧ នៃប្រទេសជប៉ុន។

មន្ត្រីអាកាសយានដ្ឋាន បានឲ្យដឹងថា អាកាសយានដ្ឋានអន្តរជាតិ Kansai នឹងនៅតែបន្តបិទទ្វារពេញមួយសប្តាហ៍ អាស្រ័យទៅលើទំហំនៃការខូចខាតផ្លូវហោះហើរ ។ ក្នុងនោះ ព្រលានយន្តហោះអន្តរជាតិ Kansai ដែលសាងសង់នៅលើកោះសិប្បនិម្មិតនោះត្រូវជន់លិច ហើយខ្យល់ព្យុះ Jebi នេះក៏បានធ្វើឲ្យនាវាដឹកប្រេងទម្ងន់២.៥៩១តោន ទៅបុកស្ពានដែលតភ្ជាប់កោះនេះទៅដីគោកដែលការណ៍នេះបណ្តាលឱ្យអ្នកដំណើរប្រហែល ៥០០០នាក់ ត្រូវជាប់នៅក្នុងព្រលានយន្តហោះ ប៉ុន្តែនៅថ្ងៃពុធនេះ ពួកគេត្រូវបានជំលៀសចេញពីព្រលានយន្តហោះតាមទូក និងរថយន្តក្រុងហើយ។ កាលពីថ្ងៃទី៥ខែកញ្ញា មានជើងហោះហើរ ជាង ២០០ជើងត្រូវបានលុបចោល ធ្វើឲ្យ ពលរដ្ឋជាង ៣០.០០០នាក់រងផលប៉ះពាល់នៅក្នុងអាកាសយានដ្ឋាន Kansai ។ ក្រុមហ៊ុនអាកាសចរណ៍ Nippon Airways បានផ្អាកលក់សំបុត្រសម្រាប់ជើងហោះហើរនៅក្នុងអាកាសយានដ្ឋាន Kansai រហូតដល់ថ្ងៃទី១១ខែកញ្ញា ។ ចំណែក ក្រុមហ៊ុន Japan Airlines ក៏បានសម្រេច បង្កើនជើងហោះហើរនៅអាកាសយាន ដ្ឋាន Narita ជិតទីក្រុងតូក្យូ ។ ការផ្អាកហោះហើរនៅអាកាសយានដ្ឋានអន្តរជាតិ Kansai ដោយសារតែព្យុះ Jebi បង្កក្តីបារម្ភយ៉ាងខ្លាំងពីការជះឥទ្ធិពល អាក្រក់ដល់សេដ្ឋកិច្ចតំបន់ភាគខាងលិច និងតំបន់ជាច្រើនទៀត នៅទូទាំងប្រទេស ជប៉ុន។ នៅអូសាកាឯនោះវិញ ផ្លូវរថភ្លើង និងរថភ្លើងក្រោមដីបានបើកដំណើរការជាធម្មតាវិញហើយ នៅឡើយតែព្រលានយន្តហោះ Kansai ដែលរងការខូចខាតខ្លាំង។ ក្រៅពីនេះ យោងតាមក្រុមហ៊ុនថាមពលអគ្គិសនី Kansai លំនៅដ្ឋានជាង ១,៦លាន នៅអូសាកា និងក្យូតុ បានដាច់អគ្គិសនី។ ដោយឡែក លំនៅដ្ឋាន និងកន្លែងអាជីវកម្មចំនួន ៣៤៩.០០០ នៅបន្តគ្មានអគ្គិសនីប្រើប្រាស់ដល់ថ្ងៃនេះ។ គួរជម្រាបថា លំនៅឋានជាង ៩៨០ ខ្នង បានរងការខូចខាត ខណៈប្រជាជន ជប៉ុនជាង ១.២លាននាក់ នៅខេត្ត ជីហ្វ៊ូ (Gifu), អូសាកា (Osaka), មីអេ (Mie), និង អៃជិ (Aichi) នៅតែមិនទាន់មានអគ្គិសនីប្រើប្រាស់ ដោយសារការវាយលុក របស់ព្យុះ Jebi។ គិតត្រឹមល្ងាចថ្ងៃពុធនេះ ព្យុះទីហ្វុង Jebi ដែលត្រូវគេចាត់ទុកថា ជាព្យុះអាក្រក់បំផុត ដែលបានវាយប្រហារ ប្រទេសជប៉ុន គិតក្នុងរយៈពេល ២៥ឆ្នាំ កន្លងទៅនេះ ហាក់បានថយចុះឥទ្ធិពល បន្តិចហើយ និងកំពុងបន្តបោកបក់ឆ្ពោះទៅ កាន់ភាគពាយ័ព្យ។ ប្រភព៖ Kyodo News